Féll úr bíl á ferð við að taka upp Snapchat myndband

Bresk kona féll úr bíl á ferð á hraðbrautinni M25 í nótt en hún hafði verið að halla sér út um bílgluggann til að taka upp myndband á samfélagsmiðlinum Snapchat. Konan slasaðist ekki alvarlega.

Lögreglan í Surrey á Bretlandi tísti um málið í morgun og sagði að af einskærri heppni hafi konan „ekki slasast alvarlega eða dáið.“ Sjúkraflutningamenn hlúðu að konunni á vettvangi en samkvæmt upplýsingum frá lögreglunni var enginn handtekinn vegna málsins.

Konan hafði setið í farþegasæti bílsins og hallað sér út um gluggann til að taka upp myndband fyrir Snapchat. Hún datt út um gluggann en eins og áður sagði slasaðist hún ekki alvarlega.