Leikur KR og Flora Tallin sýndur beint

Leikur Flora Tallin og KR í 2. umferð undankeppni Evrópudeildarinnar verður sýndur beint á Stöð 2 eSport. Leikurinn hefst klukkan 16:30.

Það er mikið undir í leiknum í Eistlandi í kvöld, ekki bara sæti í 3. umferð undankeppni Evrópudeildarinnar.

Ef KR tapar missir Ísland eitt af fjórum sætum sínum í Evrópukeppnum karla. Undanfarin ár hefur Ísland átt eitt sæti í undankeppni Meistaradeildar Evrópu og þrjú sæti í undankeppni Evrópudeildarinnar. Það verður þannig á næsta tímabili en breytist tímabilið 2022-23 ef KR-ingar tapa í dag. Þá fá bara Íslands- og bikarmeistarar og eitt lið til viðbótar Evrópusæti.

KR steinlá fyrir Celtic, 6-0, í 1. umferð undankeppni Meistaradeildarinnar 18. ágúst og fór því í undankeppni Evrópudeildarinnar.

Ef KR vinnur í Tallin í kvöld fer liðið í 3. umferð undankeppninnar þar sem það mætir annað hvort Linfield frá Norður-Írlandi eða Floriana frá Möltu á útivelli. Möguleikarnir ættu því að vera góðir að komast í umspil um sæti í riðlakeppni Evrópudeildarinnar.

Eins og áður sagði hefst leikur Flora Tallin og KR klukkan 16:30 og verður sýndur beint á Stöð 2 eSport.