Fyrsta CrossFit dóttirin er að fara að eignast dóttur

Anníe Mist Þórisdóttir opinberaði það í Youtube viðtali við Rory Mckernan að hún viti kyn barnsins síns sem er vona á í ágústmánuði. Hún ræðir þar hvernig hún hugsar sér að æfa með meðgöngunni og hvað taki við eftir hana.

Anníe Mist er nýbúin að gefa frá sér sætið sitt á heimsleikunum í CrossFit í haust en hún hafði tryggt sér það með því að ná öðru sætinu í opna hluta undankeppninnar eða „The Open“ eins og flestir þekkja hann.

Anníe Mist var mætt til Miami á dögunum þar sem Wodapalooza CrossFit mótið fór fram en var auðvitað ekki að keppa enda komin fjóra mánuði á leið. Anníe Mist tók þátt í því að gera umgerðina um mótið enn glæsilegri eins og að taka þátt í pallborðsumræðum og öðru tengdu styrktaraðilum hennar.

Anníe Mist veitti líka viðtöl og þar á meðal ræddi hún við Rory Mckernan sem var starfsmaður CrossFit hreyfingarinnar í níu ár áður en hann var hætti hjá fyrirtækinu á síðasta ári. Rory Mckernan var eitt af andlitum CrossFit í næstum því áratug og þekkir Anníe Mist vel enda er hún ein reyndasta CrossFit kona sögunnar.

Það var einmitt Anníe Mist sem var „Dóttir“ númer eitt til að keppa á heimsleikunum í CrossFit árið 2009. Anníe Mist var líka fyrsta konan til að verða tvisvar heimsmeistari í CrossFit (2011 og 2012) og þá hefur hún komist fimm sinnum á verðlaunapallinn á heimsleikunum (2 gull, 2 silfur og 1 brons).

Anníe Mist fer yfir það í viðtalinu að hún vilji sýna öðrum konum að það sé hægt að eignast barn og halda áfram í CrossFit og sé því tilbúin að greina öllum frá sinni upplifun af meðgöngunni. Hún vill verða sterk fyrirmynd, ekki bara sem CrossFit goðsögn eins og hún er heldur einnig sem móðir sem getur haldið sér í hópi þeirra bestu í CrossFit.

Ekki er vitað hvort að þetta hafi verið slys eða planað en Anníe Mist, sem er alltaf mjög hreinskilin í viðtölum, missti það út úr sér í spjallinu við Mckernan að hún ætti von á dóttur í ágúst.

Anníe Mist var þar að tala um æfingaálagið á meðan hún er ófrísk en Anníe ætlar sér að halda áfram að keppa í CrossFit eftir að hún eignast barnið.

„Númer er eitt, tvö og þrjú er auðvitað að það sé allt í lagi með barnið mitt eða að það sé í lagi með dóttur mína,“ sagði Anníe Mist og Rory Mckernan greip þar inn í og fékk það staðfest að barnið væri stelpa. „Áttu von á dóttur? spurði Rory Mckernan og Anníe svaraði: „Já. Ég hef ekki sagt það opinberlega áður en ég að fara eignast stelpu og þetta verður nýja CrossFit dóttirin,“ sagði Anníe.

Rory Mckernan fagnaði því sérstaklega þegar Anníe Mist staðfesti við hann að það væri von á nýrri „Dóttir“ en það ætti að renna CrossFit blóð um hennar æðar enda báðir foreldrarnir mjög framarlega í íþróttinni.

Þetta er líka skemmtilegt þar sem Anníe Mist átti mikinn þátt í að búa til CrossFit æfinguna „Dóttir“ sem var kynnt í tengslum við alþjóðlega Reykjavík CrossFit mótið í fyrra og „Dóttir“ var líka ein af greinunum á stóra CrossFit mótinu í Dúbaí í desember.

Það má sjá viðtalið við Anníe Mist í pakka Rory Mckernan frá degi tvö á Wodapalooza CrossFit mótinu sem er aðgengilegur hér fyrir neðan. Myndbandið er stillt inn á það að byrja þegar spjallið við Anníe Mist hefst.