Báru kennsl á handlegginn sem fannst á Selvogsgrunni

Upphandleggsbein sem kom í veiðarfæri báts á Selvogsgrunni árið 2017 er af íslenskum karlmanni sem hvarf tæpum tveimur árum áður. Þetta kemur fram í tilkynningu frá lögreglu á Suðurlandi. Vísir greindi frá því í janúar að umræddar líkamsleifar hefðu fundist og var málið þá hið eina óupplýsta sinnar tegundar á Íslandi.

Upphandleggsbeinið er af Guðmundi Geir Sveinssyni sem fæddur var 13. apríl 1974 og búsettur á Selfossi. Leit að honum hófst 26. desember 2015 en þá voru sterkar vísbendingar um að hann hefði fallið í Ölfusá við kirkjugarðinn á Selfossi.

Leitin reyndist árangurslaus og var hætt. „En allar götur síðan hafa menn svipast um eftir því hvort eitthvað fyndist sem skýrt gæti hvarf hans,“ segir í tilkynningu lögreglu.

Sjá einnig: Hand­leggur kom í veiðar­færi báts á Sel­vogs­grunni árið 2017

Líkt og Vísir greindi frá í janúar fengu sjómenn á snurvoðarbát upphandleggsbein úr manni í veiðarfæri við veiðar á Selvogsgrunni 18. maí 2017.

Sýni úr beininu var sent í aldursgreiningu og fékkst þar sú niðurstaða að það væri úr manni sem að öllum líkindum hefði látist á tímabilinu frá 2004 til 2007. „[…] og því fáir sem komu til greina sem eigendur að því,“ segir í tilkynningu lögreglu. 

Í janúar síðastliðnum var svo ákveðið að útvíkka umrætt tímabil. Við rannsókn Rättmedicinalverket í Svíþjóð kom í ljós að DNA-snið úr beininu samsvaraði DNA-sýnum sem aflað hafði verið úr aðstandendum Guðmundar Geirs þegar hann hvarf.

Lögregla hefur fundað með aðstandendum um niðurstöðu málsins og verða þessar jarðnesku leifar afhentar þeim á allra næstu dögum.

Höfðu ekki fundið neinar vísbendingar

Borin voru kennsl á höfuðkúpu manns sem hvarf í umdæmi lögreglu á Suðurlandi fyrir 25 árum í janúar síðastliðnum. Maðurinn hét Jón Ólafsson, fæddur 8. júlí 1940 og er talinn hafa fallið í Sogið á aðfangadag 1987. Lögregla á Suðurlandi hefur undanfarin misseri unnið að því að safna lífsýnum úr aðstandendum fólks sem horfið hefur úr umdæminu á liðnum árum.

Vísir ræddi við Odd Árnason, yfirlögregluþjón á Suðurlandi, um höfuðkúpuna í janúar. Þegar Oddur var inntur eftir því hvort lögregla hafi inni á sínu borði fleiri óupplýst mál af slíku tagi, þar sem finnast líkamsleifar sem ekki tekst að bera kennsl á, sagðist Oddur aðeins vita um eitt. Um væri að ræða líkamsleifar sem komu í net úti fyrir Suðurlandi í maí árið 2017.

„Eftir því sem ég best veit er einungis eitt tilvik sem er enn óþekkt. Það er handleggur af manni sem kom í veiðarfæri báts suður af landinu í Selvogi, á Selvogsgrunni, 2017. Við vitum að hann [handleggurinn] er nýlegur í skilningi þess orðs að hann er frá síðustu áratugum og við erum búnir að fá DNA-snið frá honum en hann hefur ekki samsvarað þeim sýnum sem eru til hjá okkur í dag.“

Oddur sagði þá að engar vísbendingar hefðu fundist í tengslum við málið. Þá væri DNA-sniðið ekki endilega íslenskt og allt eins líklegt að um útlending væri að ræða.

Fréttin hefur verið uppfærð.