Viðbragðsáætlun Alþingis við heimsfaraldri hefur verið virkjuð

Alþingi hefur virkjað viðbragðsáætlun við heimsfaraldri vegna COVID-19 faraldursins. Í tilkynningu á vef Alþingis segir að við gerð áætlunarinnar hafi verið stuðst við landsáætlun Almannavarna um heimsfaraldur og miðar hún að því að lágmarka áhrif heimsfaraldurs á starfsemi þingsins.

Áætlunin tekur til allrar starfsemi Alþingis, skrifstofu þess og er ætlað að tryggja skipulögð og samræmd viðbrögð ef til slíks faraldurs kemur.

Ábyrgð á framkvæmd viðbragðsáætlunar er í höndum Rögnu Árnadóttur, skrifstofustjóra Alþingis en Steingrímur J. Sigfússon, forseti Alþingis, tekur ákvarðanir sem lúta að tilhögun þingfunda og breytingum á starfsáætlun þingsins í samráði við forsætisnefnd þingsins og formenn þingflokka.