Enginn bjóst við því að Íslandsmeistarar KR myndu slá skosku meistarana í Celtic út í Glasgow í forkeppni Meistaradeildarinnar í gærkvöldi en frammistaðan var engu að síður mikil vonbrigði. Sex núll tap og lítil mótstaða frá Vesturbæjarliðinu.
Rúnar Kristinsson hefur náð frábærum árangri með KR-liðið heima á Íslandi en árangur liðsins í Evrópukeppninni undir hans stjórn er langt frá því að vera glæsilegur.
Undanfarin tvö ár hafa KR-ingar vissulega ekki verið mjög heppnir með mótherja en bæði árin hefur liðið tapað útileik sínum mjög stórt.
KR tapaði 1-7 á móti Molde út í Noregi í fyrra og svo 0-6 á móti Celtic í Skotlandi í gær. KR datt einnig út 5-0 samanlagt á móti Celtic í Evrópukeppninni á síðasta tímabili Rúnars áður en hann reyndi fyrir sér í þjálfun erlendis.
Nú er svo komið að markatala liða Rúnars í síðustu þrettán Evrópuleikjum undir hans stjórn er orðin afar skrautleg.
Í þessum þrettán Evrópuleikjum, eða öllum Evrópuleikjum KR undir stjórn Rúnars frá og með leikjunum við Dinamo Tbilisi í þriðju umferð forkeppni Evrópudeildarinnar 2011, hefur KR-liðið skorað 32 mörkum færra en andstæðingarnir.
Markatalan er sem sagt 7-39 í þessum þrettán leikjum. Eini sigurinn er 3-0 sigur á norður-írska félaginu Glentoran á útivelli 11. júlí 2013.
KR-liðið spilaði tólf Evrópuleiki á þeim þremur tímabilum sem Rúnars naut ekki við á árunum 2015 til 2017 en markatalan í þeim er aftur á móti eitt mark í plús eða 18-17.
Rúnar Kristinsson og lærisveinar hans frá engu að síður annað tækifæri til að gera eitthvað í Evrópu í sumar því þeir fara nú inn í forkeppni Evrópudeildarinnar.
KR í Evrópukeppni undir stjórn Rúnars Kristinssonar:
- 2020 - forkeppni Meistaradeildarinnar
- 0-6 á móti Celtic frá Skotlandi (í einum leik)
- 2019 - forkeppni Evrópudeildarinnar
- 1-7 á móti Molde frá Noregi (í tveimur leikjum)
- 2014 - forkeppni Meistaradeildarinnar
- 0-5 á móti Celtic frá Skotlandi(í tveimur leikjum)
- 2013 - forkeppni Evrópudeildarinnar
- 3-0 á móti Glentoran frá Norður-Írlandi (í tveimur leikjum)
- 2-6 á móti Standard Liege frá Belgíu(í tveimur leikjum)
- 2012 - forkeppni Meistaradeildarinnar
- 1-9 á móti HJK Helsinki frá Finnalandi (í tveimur leikjum)
- 2011 - forkeppni Evrópudeildarinnar
- 8-2 á móti ÍF frá Færeyjum (í tveimur leikjum)
- 3-2 á móti MŠK Žilina frá Slóvakíu (í tveimur leikjum)
- 1-6 á móti Dinamo Tbilisi frá Georgíu(í tveimur leikjum)
- 2010 - forkeppni Evrópudeildarinnar
- 2-3 í seinni leiknum á móti Karpaty Lviv frá Úkraínu (í einum leik)
Stóru töpin í Evrópu undir stjórn Rúnars Kristinssonar:
- 1-4 á móti Dinamo Tbilisi frá Georgíu 2011
- 0-7 á móti HJK Helsinki frá Finnalandi 2012
- 0-4 á móti Celtic frá Skotlandi 2014
- 1-7 á móti Molde frá Noregi 2019
- 0-6 á móti Celtic frá Skotlandi 2020
