Segir Rio Tin­to beita samninga­tækni og hótunum til að ná vilja sínum fram

Forstjóri Landsvirkjunar segir Rio Tinto beita samningatækni og hótunum til að ná vilja sínum fram. Landsvirkjun hefur formlega óskað eftir því að trúnaði um raforkusamning sinn við Rio Tinto, eiganda álversins í Straumsvísk, verði aflétt.

Hörður Arnarsson, forstjóri Landsvirkjunar, var gestur Kristjáns Kristjánssonar í þættinum Sprengisandi á Bylgjunni í morgun.

Segir þetta ekki vera samningaviðræður

„Ef við horfum á Rio Tinto þá er langtímasamningur hjá fyrirtækinu sem við skifuðum undir 2010 og endurnýjuðum árið 2014. Það eru erfiðleikar á álmörkuðum og fyrirtækið hefur áhuga á því að endurskoða það. Þeir telja það réttu leiðina að byrja þær viðræður, þetta eru ekki samningaviðræður því það er gildandi samningur, þeir telja það réttu leiðina að hóta samfélaginu að ef þeir fá ekki það sem þau vilja þá munu þeir skoða að loka. Þetta er í eðli sínu samningatækni. Menn geta velt því fyrir sér hversu siðleg hún er og hvort hún sé boðleg á Íslandi en þetta er sú leið sem fyrirtækið velur að fara. Þetta er fordæmalaust.“

Mikilvægt fyrir samfélagið að trúnaði sé aflétt

„Í ljósi þessara umræðna sem hafa verið þá teljum við æskilegt í anda gagnsæis að það sé upplýst meira um samninginn og þess vegna skrifuðum við bréf til Rio Tinto í síðustu viku þar sem við höfum óskað formlega eftir því við fyrirtækið að trúnaði sé aflétt af samningnum. Í ljósi þeirra orða sem hafa fallið, bæði um raforkuverðið og ábyrgðir og annað þá held ég að það sé afar mikilvægt fyrir samfélagið að trúnaði sé aflétt.“

Sjá einnig: Hörður baunar á Sam­tök iðnaðarins vegna upp­runa­á­byrgða

Tilkynnt var um það 12. febrúar síðastliðinn að RioTinto leitaði leiða til þess að bæta rekstur álversins vegna erfiðrar stöðu á alþjóðlegum álmörkuðum. Stjórnendur álversins sögðu það meðal annars koma til greina að loka álverinu.

Síðast endurskoðaður árið 2014

Stjórnendur hafa síðan þá lagt áherslu á að raforkusamningur fyrirtækisins við Landsvirkjun verði endurskoðaður en það var síðast gert árið 2014.

Í þættinum sagði Hörður að í samningnum væru meðal annars ákvæði um endurskoðun sem eigi að tryggja samkeppnishæfni álversins. Hann telur að það væri til gagns fyrir alla aðila að trúnaðinum yrði aflétt svo hægt væri að ræða samninginn opinberlega.