„Janúar var mjög illviðrasamur“

Veðurstofa Íslands hefur birt yfirlit sitt yfir tíðarfar í janúar síðastliðnum. Þar kemur meðal annars fram að illviðrisdagar hafi verið óvenju margir eða með því hæsta sem verið hefur. Þá var meðalvindhraði einnig óvenju hár og í raun sá hæsti síðan í febrúar 2015:

„Janúar var mjög illviðrasamur. Meðalvindhraði var óvenju hár og sá hæsti síðan í febrúar 2015. Illviðrisdagar voru óvenju margir, með því mesta sem hefur verið. Úrkoma var vel yfir meðallagi um mest allt land. Mjög snjóþungt var á Vestfjörðum og féllu tvö stór snjóflóð á Flateyri og það þriðja í Súgandafirði þ. 14. Samgöngur riðluðust margoft í mánuðinum vegna óveðurs,“ segir í  yfirlitinu á vef Veðurstofunnar.

Að jafnaði var hlýjast á Austurlandi en kaldast á Vestfjörðum og inni á hálendi. Meðalhiti mánaðarins var hæstur í Surtsey, 2,9 stig, en lægstur, -6,8 stig, í Sandbúðum. Í byggð var meðalhitinn lægstur -4,1 stig í Svartárkoti.

„Hæsti hiti mánaðarins mældist 15,3 stig á Dalatanga þ. 22. Mest frost í mánuðinum mældist -21,8 stig í Veiðivatnahrauni þ. 3. Mest frost í byggð mældist -20,5 í Víðidal þ. 3.,“ segir á vef Veðurstofunnar.

Þá var úrkomusamt í janúar eins og flestir landsmenn muna eflaust eftir:

„Úrkoma í Reykjavík mældist 124,0 mm sem er 64 % umfram meðallag áranna 1961 til 1990. Á Akureyri mældist úrkoman 77,9 mm sem er 41 % umfram meðallag áranna 1961 til 1990. Í Stykkishólmi mældist úrkoman 131,4 mm sem er nærri tvöfalt meiri úrkoma en að meðallagi.

Dagar þegar úrkoma mældist 1,0 mm eða meira í Reykjavík voru 23, 10 fleiri en í meðalári. Á Akureyri mældist úrkoma 1,0 mm eða meiri 20 daga mánaðarins , 9 fleiri en í meðalári.“

Það var síðan mikið fannfergi á Vestfjörðum í mánuðinum. Þann 14. janúar féllu stór snjóflóð á Flateyri og Suðureyri og ollu miklu eignatjóni. Þá varð öngþveiti á Keflavíkurflugvelli þann 13. janúar þegar mikið hríðarveður gekk yfir Reykjanes.

Nánar má lesa um tíðarfarið í janúar á vef Veðurstofu Íslands.