Aðildar­fé­lög BSRB boða til at­kvæða­greiðslu um verk­falls­boðun

Öll aðildarfélög BSRB sem semja við ríki og sveitarfélög og hafa verkfallsrétt hafa samþykkt að undirbúa atkvæðagreiðslur um verkfallsboðun.

Þetta var niðurstaða fundar sem boðaður var klukkan 15 í dag með samningseiningum BSRB.

Atkvæðagreiðslurnar fara fram hjá hverju félagi fyrir sig 17. til 19. febrúar næstkomandi og er áætlað að áformaðar aðgerðir hefjist í mars, er fram kemur í tilkynningu frá BSRB.

Um nítján þúsund starfsmenn ríkis og sveitarfélaga starfa undir kjarasamningum aðildarfélaga BSRB og hafa félögin verið kjarasamningslaus í á ellefta mánuð.

Kjarasamningaviðræðum aðildarfélaga BSRB við Reykjavíkurborg og Samband íslenskra sveitarfélaga var vísað til ríkissáttasemjara í lok september á síðasta ári.

Viðræður munu nú halda áfram samhliða undirbúningi verkfallsaðgerða að sögn BSRB.

Félagsmenn aðildarfélaga BSRB starfa meðal annars á Landspítalanum og í annarri heilbrigðisþjónustu, í velferðarþjónustu, skólum, leikskólum og frístundaheimilum, í sundlaugum, íþróttamahúsum og þjónustu við aldraðra og fólk með fötlun, er fram kemur í tilkynningunni.

Eftirtalin aðildarfélög BSRB hafa samþykkt að hefja undirbúning verkfallsaðgerða:

• Félag opinberra starfsmanna á Austurlandi
• Félag opinberra starfsmanna á Vestfjörðum
• Félag starfsmanna stjórnarráðsins
• FOSS, stéttarfélag í almannaþjónustu
• Kjölur – stéttarfélag starfsmanna í almannaþjónustu
• Landssamband slökkviliðs- og sjúkraflutningamanna
• Sameyki – stéttarfélag í almannaþjónustu
• Sjúkraliðafélag Íslands
• Starfsmannafélag Dala- og Snæfellsnessýslu
• Starfsmannafélag Fjallabyggðar
• Starfsmannafélag Fjarðabyggðar
• Starfsmannafélag Garðabæjar
• Starfsmannafélag Hafnarfjarðar
• Starfsmannafélag Húsavíkur
• Starfsmannafélag Kópavogs
• Starfsmannafélag Mosfellsbæjar
• Starfsmannafélag Suðurnesja
• Starfsmannafélag Vestmannaeyja