Þremur eld­flaugum skotið á banda­ríska sendi­ráðið í Bagdad

Þremur eldflaugum var í dag skotið á bandaríska sendiráðið í íröksku höfuðborginni Bagdad. Sendiráðið er að finna á græna svæðinu svokallaða þar sem öryggisgæsla er mikil.

Talsmaður írakskra öryggissveita segir að ekki hafi borist tilkynningar um manntjón, að því er fram kemur í frétt AFP.

Óeirðir hafa verið á götum Bagdad í dag og í kvöld þar sem öryggissveitir hafa beitt táragasi gegn mótmælendum. Mótmælendur hafa varpað eldsprengjum, grjóti og öðru lauslegu að öryggissveitum.

Ekki liggur fyrir hver eða hverjir skutu eldflaugunum að sendiráðinu.