Guðmundur verður í banni í El Clásico í Njarðvík í kvöld

Guðmundur Jónsson, fyrrum Njarðvíkingur og leikmaður Keflavíkur í dag, missir af leik Njarðvíkur og Keflavíkur í Domino´s deild karla í kvöld.

Guðmundur var í gær dæmdur í eins leiks bann af Aga- og úrskurðarnefnd Körfuknattleikssambands Íslands.

Þetta eru eftirmálar af brottvísun Guðmundar í leik Keflavíkur og Grindavíkur á dögunum. Guðmundur var rekinn út úr húsi eftir samskipti sín og Grindvíkingsins ValdasVasylius strax í fyrsta leikhluta.

Guðmundur Jónsson er einn af þeim sem eiga hvað flesta leiki með báðum liðum í innbyrðisviðureignum Njarðvíkur og Keflavíkur í gegnum tíðina en hann hóf feril sinn í Njarðvík en hefur spilað með Keflavíkurliðinu frá árinu 2013.

Aga- og úrskurðarnefnd hefur komist að niðurstöðu í málinu og má sjá hana hér fyrir neðan.

Með vísan til ákvæðis a. liðar 1. mgr. 13. gr. og ítrekunarákvæðis sömu greinar reglugerðar um aga- og úrskurðarmál skal hinn kærði, Guðmundur Jónsson, leikmaður Keflavíkur, sæta eins leiks banni vegna háttsemi sinnar í leik Keflavíkur og Grindavíkur í Domino's deild karla, sem leikinn var 9. janúar 2020.

Leikur Njarðvíkur og Keflavíkur hefst klukkan 20.15 í Njarðtaksgryfjunni í kvöld en á undan verður Domino´s Körfuboltakvöld með „Í minningu Ölla“ í beinni frá Njarðtaksgryfjunni. Í dag, fimmtudaginn 16. janúar, verða tuttugu ár liðin frá því að körfuboltamaðurinn Örlygur Aron Sturluson lést af slysförum.

Allur aðgangseyrir á leikinn mun renna óskiptur í Minningarsjóð Ölla en sjóður Ölla styrkir börn til íþróttaiðkunar sem ekki eiga kost á því vegna bágrar fjárhagsstöðu foreldra eða umsjónarmanna. Að leik loknum eða kl. 22.15 mun Stöð 2 Sport svo sýna heimildarmyndina „Ölli“ eftir Garðar Örn Arnarson.

Þeir sem vilja leggja málefninu lið geta lagt inn á reikning sjóðsins:0322-26-021585, kt. 461113-1090.

Allur sá peningur sem safnast fer í að styrkja börn til íþróttaiðkunar. Forsvarsmenn sjóðsins gefa sína vinnu sem og allir þeir sem að starfseminni koma.