Hlynur segir að sumir gömlu liðsfélagarnir séu að detta í ellilífeyrinn þessa dagana

Hlynur Bæringsson var einn af þremur leikmönnum Domino´s deildar karla í körfubolta sem náðu því á dögunum að spila á fjórða áratugnum í úrvalsdeild karla.

Auk Hlyns hafa þeir Logi Gunnarsson og Helgi Már Magnússon náð þessu en Jakob Örn Sigurðarson getur það líka um leið og hann spilar á ný með KR.

Hlynur ræddi þessi tímamót í viðtali við Fréttablaðið í dag. „Það var skrýtið að sjá þetta en maður er hættur að velta sér upp úr svona áföngum, líka þegar kemur að fæðingardögum eftir að ég sá að margir í liðinu voru ekki fæddir þegar ég lék minn fyrsta landsleik. Fæstir í liðinu mínu og ef til vill deildinni voru fæddir þegar ég lék fyrsta leik minn í deildinni,“ segir Hlynur við Fréttablaðið.

Hlynur er fæddur 6. júlí 1982 og verður því 38 ára gamall í sumar. Hann lék sinn fyrsta leik í úrvalsdeild karla með Skallagrími á móti Val 16. október 1997 og skoraði þá fjögur stig á aðeins fjórum mínútum.

Hlynur spilaði fyrsta landsleikinn sinn á móti Makedóníu 23. febrúar 2000. Hlynur hafði verið í hóp landsliðsins í leik í nóvember 1999 en var þá ekki á skýrslu.

Í síðasta leik Stjörnunnar voru þeir Dúi Þór Jónsson, Ingimundur Orri Jóhannsson og Orri Gunnarsson liðsfélagar Hlyns. Dúi og Ingimundur eru fæddir árið 2001 og Orri árið 2003 en Hlynur var búinn að stíga fyrstu sporin með A-landsliðinu áður en þeir fæddust. Þegar Orri fæddist í ágúst árið 2003 þá var Hlynur búinn að spila 112 leiki í úrvalsdeild.

„Þetta er orðið rosalega langur tími, 23 ár núna í haust frá því að ég kom inn í lið Skallagríms, þá ennþá í 10. bekk. Ég hef oft pælt í því, þegar menn spila eins lengi og ég hver aldursmunurinn er á liðsfélögum mínum í dag og liðsfélögum mínum í byrjun. Alexander Ermolinskij, sem var liðsfélagi minn fyrsta árið, var fæddur 1959 og ég var að spila gegn eldri mönnum sem eru ein­hverjir að detta í ellilífeyrinn þessa dagana. Ég fékk f ljótlega stórt hlut­verk og lék með mörgum heiðurs­mönnum,“ sagði Hlynur en það má lesa allt viðtalið við hann hér.