Þriðja árið í röð sem KR missir lykilmann til annars íslensks félags

KR-ingar ættu að vera farnir að þekkja það að missa máttarstólpa í sínu lið til annars félags í Domino´s deildinni í körfubolta.

Jón Arnór Stefánsson, fyrirliði Íslandsmeistara KR, gekk í dag til liðs við Valsmenn og mun spila með Hlíðarendafélaginu í Domino´s deild karla á næstu leiktíð.

Það þýðir að þriðja árið í röð missir KR-liðið risaleikmann til annars íslensk félags.

Brynjar Þór Björnsson fór til Tindastóls sumarið 2018 og Pavel Ermolinskij fór til Vals í fyrrasumar. Brynjar Þór var aðeins eitt ár í burtu en Pavel er ennþá leikmaður Vals og mun því spila með Jóni Arnóri í vetur.

KR hefur orðið Íslandsmeistari sex ár í röð en enginn Íslandsmeistaratitill var í boði í vor vegna kórónuveirufaraldursins. Pavel Ermolinskij hefur átt þátt í öllum þessum sex Íslandsmeistaratitlum KR-liðsins en Jón Arnór var með í þeim þremur síðustu.

Brynjar Þór Björnsson var fyrirliði KR og búinn að lyfta Íslandsmeistaratitlinum fimm ár í röð þegar hann samdi við Tindastól fyrir 2018-19 tímabilið. Brynjar byrjaði frábærlega með Stólunum og slá meðal annars 27 ára gamalt met þegar hann skoraði sextán þriggja stiga körfur í leik á móti Breiðabliki.

Brynjar Þór og félagar duttu út í átta liða úrslitum í úrslitakeppninni en Brynjar var með 15,4 stig og 3,2 stoðsendingar að meðaltali í leik með Tindastólsliðinu.

Pavel Ermolinskij var búinn að vera leikstjórnandi og leiðtogi KR-liðsins í sjö Íslandsmeistaratitlum á níu árum þegar hann ákvað að semja við Val sumarið 2019. KR hafði þa orðið Íslandsmeistari á sjö tímabilum í röð með hann innanborðs því KR missti af titlinum 2012 og 2013 þegar Pavel var í atvinnumennsku út í Svíþjóð.

Pavel Ermolinskij var líka í metaham eftir að hann gekk til liðs við Valsmenn. Pavel jafnaði þar með met Jóns Kr. Gíslasonar yfir flestar stoðsendingar hjá Íslending í einum deildarleik þegar hann gaf 17 stoðsendingar í leik á móti Fjölni.

Pavel Ermolinskij og félagar hans í Val björguðu sér frá falli en voru ekki á leið í úrslitakeppnina þegar deildin var stöðvuð útaf COVID-19. Pavel Ermolinskij var með 9,3 stig, 9,3 fráköst og 6,0 stoðsendingar að meðaltali í leik á Íslandsmótinu.

Jón Arnór Stefánsson tók við fyrirliðabandinu þegar Brynjar Þór Björnsson fór í Tindastóls. Jón Arnór tók þannig við Íslandsmeistarabikarnum vorið 2019.