Jóhann Möller ráðinn framkvæmdastjóri Stefnis

Jóhann Möller hefur verið ráðinn framkvæmdastjóri Stefnis hf. og mun taka við starfinu 1. ágúst. Jóhann hefur starfað á fjármálamarkaði í 20 ár og hjá Stefni frá árinu 2006 við stýringu á innlendum hlutabréfasjóðum auk þess að veita hlutabréfateymi félagsins forstöðu síðast liðin þrjú ár, að því er fram kemur í tilkynningu.

Haft er eftir Jóhanni í tilkynningu að það sé mikill heiður að fá tækifæri til að leiða starfsmannahóp Stefnis. Markmiðið sé að vera áfram í fararbroddi í stýringu og uppbyggingu nýrra sjóða.

Stefnir er íslenskt sjóðastýringarfyrirtæki, stofnað árið 1996 með um 250 milljarða króna í virkri sjóðastýringu í lok árs 2019, að því er segir í tilkynningu. Hjá Stefni starfa 20 sérfræðingar í fjórum teymum.