Mikinn reyk hefur lagt yfir vesturhluta Reykjavíkur nú síðdegis eftir að eldur kviknaði í íbúðarhúsi á horni Bræðraborgarstígs og Vesturgötu á fjórða tímanum. Loftmyndir sem teknar voru á fimmta tímanum sýna reykjarmökkinn leggja frá húsinu og hafa íbúar margra hverfa í vesturborginni fundið reykjarlykt.
Bæði lögregla og slökkvilið beina því til fólks í nágrenni við brunann að loka gluggum og halda sig fjarri vettvangi. Fjórir voru fluttir á slysadeild og þá voru einhverjir handteknir við húsið, sem varð alelda og líklega ónýtt.
