Ása tekur við af Elíasi hjá Stoð

Ása Jóhannesdóttir hefur verið ráðin framkvæmdastjóri hjá Stoð. Hún tekur við stöðunni af Elíasi Gunnarssyni sem leitt hefur félagið frá árinu 2005.

Í tilkynningu kemur fram að Ása hafi starfað sem deildarstjóri hjúkrunar- og lækningavörudeildar MEDOR síðastliðin sex ár. Áður var hún viðskiptastjóri hjá MEDOR og vörustjóri hjá svefnrannsóknarfyrirtækinu Flögu.

„Ása er með MBA gráðu frá Háskólanum í Reykjavík, meistaragráðu í heilbrigðisvísindum frá Háskóla Íslands og B.Sc. gráðu í hjúkrunarfræði frá Háskóla Íslands.

Ása er gift Sigurði G. Kristinssyni jarðfræðingi og eiga þau fjögur börn. Ása mun hefja störf hjá Stoð 15. júní,“ segir í tilkynningunni.

Stoð er framleiðslu- og þjónustufyrirtæki á heilbrigðissviði og framleiðir og selur stoðtæki, gervilimi, spelkur, bæklunarskó, innlegg og aðrar stuðningsvörur. Hjá Stoð starfa um 35 manns í Hafnarfirði og á Bíldshöfða, en fyrirtækið er í eigu Veritas samstæðunnar sem festi kaup á fyrirtækinu í árslok 2018.