Skrýtið að finna fyrir svo miklu hatri út af víðavangshlaupi

Arnar Pétursson, margfaldur Íslandsmeistari í maraþoni, hefur á glæstum ferli sínum sem hlaupari verið sakaður um svindl bæði í Reykjavíkurmaraþoninu og í Víðavangshlaupi ÍR.

„Þetta var mjög áhugaverður tími. Það sem var auðveldast við þetta var að ég vissi að ég hefði ekki gert neitt rangt,“ sagði Arnar í Sportinu í dag þar sem hann var gestur þeirra Henrys Birgis Gunnarssonar og Kjartans Atla Kjartanssonar. Henry grínaðist með það að Arnar hefði um tíma í raun skapað sér nafn sem einhvers konar „bad boy“ hlaupaheimsins, en Arnar kveðst vera með hreina samvisku. Hann varð hins vegar auðvitað var við sterk viðbrögð margra vegna hins meinta svindls:

„Þetta var ekki eins og að ef þú hefðir reynt að svindla og það hefði komist upp. Síðan var líka mjög fyndið að heyra frá gömlum hlaupurum sem klöppuðu mér bara á bakið; „Heyrðu, þetta er mesta umfjöllun sem að hlaup hefur nokkurn tímann fengið.“ En fyrir mér var þetta bara þvílíkur lærdómur, að fá að vera í sviðsljósinu á neikvæðan hátt. Það er ótrúlega skrýtin tilfinning, að finna þetta HATUR út af einhverju fimm kílómetra víðavangshlaupi. Hvernig er hægt að hafa svona sterka skoðun á því?“ spurði Arnar léttur í bragði.

Hann rifjaði upp málsatvik en í Víðavangshlaupi ÍR skaust hann fram úr keppinaut sínum á lokametrunum, eftir að hafa farið styttri leið á illa merktri hlaupaleiðinni.

„ÍR [sem var mótshaldari] viðurkenndi alveg að þetta væru mistök hjá þeim. Í hlaupi á ekki að vera hægt að gera eitthvað svona. Það á bara að vera braut sem að maður fylgir. En ég fékk þetta geðveikt á mig eins og að ég hefði gert eitthvað rangt, þó að í rauninni gerði ég ekkert rangt,“ sagði Arnar.

Var farinn að halda að þriðja málið kæmi upp

Eftir sigur Arnars í Reykjavíkurmaraþoninu 2014 kærði svo keppinautur hans úrslitin og taldi Arnar hafa svindlað með því að njóta aðstoðar „héra“ í hlaupinu. Málinu var vísað frá en tekið fram að betur yrði fylgst með hlaupurum á næsta ári. Arnar gat ekki annað en hlegið þegar Henry benti á að hann hefði eiginlega verið kominn undir smásjá keppnishaldara á þessum tíma, og sagðist í léttum tón nánast hafa haldið að hann yrði ásakaður um enn frekara svindl:

„Þetta voru auðvitað algjörar tilviljanir en maður var samt svona; „Eru þetta tilviljanir?“ Ég var farinn að halda að þriðja málið kæmi upp. Ég var að komast á svipaðan stað og Kári Steinn [Karlsson, Íslandsmethafi], og sá fram á að við yrðum að hlaupa í sama hlaupinu á Íslandi og ég myndi reka mig aftan í hælana á honum og fella hann svo hann dytti. Og það myndi einhvern veginn líta út eins og að ég hefði sparkað hann niður. Þá gætu allir verið; „Heyrðu, þetta er augljóst núna!““