Blaðamaður myrtur í Mexíkó

Blaðamaðurinn Jorge Armenta var myrtur í árás í norðurhluta Mexíkó samkvæmt yfirvöldum þar í landi. Armenta hafði fengið vernd vegna líflátshótanna í sinn garð, en hann stýrði miðlinum Medios Obson í borginni Ciudad Obregon.

Lögreglumaður féll einnig í árásinni, en samtökin Blaðamenn án landamæra hyggjast rannsaka málið og kanna hvers konar vernd yfirvöld höfðu veitt honum. Samtökin skilgreina Mexíkó sem hættulegasta landið fyrir blaðamenn utan stríðssvæða og eru landið í 143. sæti yfir fjölmiðlafrelsi í heiminum af 180 löndum.

Armenta er þriðji blðamaðurinn sem er myrtur í Mexíkó í ár. Lík blaðamannsins Victor Fernando Alvarez fannst í borginni Acapulco þann 11. apríl eftir að hafa horfið rúmri viku áður og í marsmánuði var Maria Elena Ferral skotin til bana þegar hún var að fara í bíl sinn. Yfir 140 blaðamenn hafa verið myrtir í Mexíkó frá árinu 2000.

Forseti Mexíkó, Andrés Manuel López Obrador hét því að binda endi á morð á blaðamönnum en hefur verið gagnrýndur fyrir aðgerðaleysi í þeim efnum. Þær yfirlýsingar sem hann hafi sett fram og aðgerðir stjórnvalda í þeim efnum séu aðeins táknrænar en hafi ekki skilað árangri.