Milka áfram í Keflavík

Dominykas Milka og Keflavík hafa komist að samkomulagi um að Milka muni leika með liðinu áfram á næstu leiktíð.

Mikla var einn besti leikmaður Dominos-deildarinnar í vetur. Hann skoraði að meðaltali 20 stig í leik og tók tólf fráköst. Hann var með framlag upp á 27,9 að meðaltali í vetur.

„Það er okkur sönn ánægja að tilkynna að nú í dag samdi Dominykas Milka við Keflavík og mun hann því mæta á parketið í Blue Höllinni næsta haust. Þetta eru gríðarlega góðar fréttir fyrir alla sem að starfinu koma,“ sagði í tilkynningu Keflavíkur.

„Milka var afar ánægður að fá tækifæri til að klæðast Keflavíkurtreyjunni áfram, hann vill ólmur klára það verkefni sem við hófum í byrjun síðasta tímabils.“

Keflavík var í 2. sæti deildarinnar þegar deildin var blásin af en liðið var tveimur stigum á eftir Stjörnunni þegar 21 leik var lokið.