Stjórn Knattspyrnusambands Íslands hefur ákveðið að greiða félögum í Pepsi Max deild karla fyrirfram samningsgreiðslu vegna sjónvarpssamninga.
Frá þessu er greint á vef KSÍ.
„Stjórn KSÍ samþykkti samhljóða á rafrænan hátt milli funda sinna 26. mars og 2. apríl að greiða félögum í Pepsi Max deild karla fyrirfram samningsgreiðslu vegna sjónvarpssamninga. Samkvæmt samningi er gjalddagi þessarar greiðslu 1. júní en verður nú greiddur 1. apríl. Þetta kemur fram í fundargerð stjórnar frá 2. apríl.“
Fyrirframgreiðsla til félaga vegna sjónvarpssamninga https://t.co/faJkeVrzI8
— Knattspyrnusambandið (@footballiceland) April 8, 2020
Er þetta gert til að koma til móts við félögin sem öll hafa orðið fyrir höggi fjárhagslega vegna kórónuveirunnar.
Ef miða má við ársreikning KSÍ frá því í fyrra er ljóst að liðin fá mis háar upphæðir en verðlaunafé telur inn í þeim upphæðum sem KSÍ gefur upp frá því á síðustu leiktíð. Þar koma KR-ingar og Víkingar, sigurvegarar Pepsi Max deildarinnar og Mjólkurbikarsins, best út en félögin fengu 1,3 milljón hvor.
