Niður­staða fékkst í deilu sjúkra­þjálfara og Sjúkra­trygginga

Sjúkraþjálfurum var óheimilt að hætta að starfa fyrirvaralaust eftir samningi Sjúkratrygginga Íslands (SÍ) þann 12. nóvember síðastliðinn samkvæmt niðurstöðu gerðardóms í deilumáli Sjúkratrygginga og Félags sjúkraþjálfara. Þetta kemur fram í tilkynningu frá stofnuninni.

Í dómsorðum gerðardóms sem fréttastofa hefur undir höndum kemur fram að báðir aðilar eigi að starfa samkvæmt samningnum til 12. janúar. Er þar vísað til þess að félaginu hafi verið skylt að viðhafa hæfilegan uppsagnarfrest á uppsögn sinni sem SÍ var tilkynnt um þann 5. nóvember síðastliðinn. Því hafi félaginu verið óheimilt að segja upp samningnum án nokkurs fyrirvara.

Sjúkraþjálfarar ánægðir með dóminn

Þrátt fyrir þetta segist Unnur Pétursdóttir, formaður Félags sjúkraþjálfara, vera ánægð með dóminn og segir að fallist hafi verið á meginsjónarmið félagsins.

„Þetta var algjörlega það sem við bjuggumst við og við erum náttúrulega afar ánægð með að gerðardómari samþykkir okkar sýn á það að það var ekki þörf á því að segja þessum samningi upp með sex mánaða fyrirvara eins og sjúkratryggingar gerðu kröfu um.“

Sjá einnig: Vísa deilu sjúkraþjálfara og Sjúkratrygginga Íslands til gerðardóms

Í nóvember síðastliðnum sögðu sjálfstætt starfandi sjúkraþjálfarar sig frá rammasamningi Sjúkratrygginga Íslands þar sem þeim þótti ekki ákjósanlegt að starfa eftir útrunnum samningi. SÍ tilkynnti Félag sjúkraþjálfara í kjölfarið til Samkeppniseftirlitsins vegna gruns um ólöglegt verðsamráð. Formaður félagsins sagði ásakanir forstjóra SÍ alvarlegar og ekki vera á rökum reistar.

Unnur segir að sú ráðstöfun gerðardómara að miða endalok samstarfs um samninginn við 12. janúar sé eingöngu ætlað til hagræðis fyrir alla aðila í ljósi hátíðanna.

“Svo þeir geti gert þær ráðstafanir að nýtt fyrirkomulag utan samnings geti tekið gildi þannig að sem minnst rask verði fyrir skjólstæðinga þjónustunnar.”

Ósammála um túlkun dómsins

Í tilkynningu frá SÍ sem barst í kvöld segir stofnunin að samkvæmt úrskurði gerðardóms í dag hafi sjúkraþjálfurum verið „óheimilt að innheimta önnur gjöld af sjúklingum en þau sem kveðið er á um í samningi SÍ.”

Félag sjúkraþjálfara er ósammála þessari túlkun stofnunarinnar.

„Við höfnum því algjörlega, vegna þess að dómurinn segir að sú krafa um það að segja samningunum upp með sex mánaða fyrirvara var ekki rétt og að málinu hafi verið staðið á réttan hátt af okkar hálfu.“

Hún segir að félagið hafi á sínum tíma tekið þá ákvörðun í umboði félagsmanna að „stíga til hliðar hreinlega á meðan Sjúkratryggingar Íslands og yfirvöld myndu setja það í eitthvað vitrænt form hvernig þau vilji haga innkaupum á þjónustu sjúkraþjálfara.“

„Ég les úrskurð gerðardóms algjörlega þannig að hann fellur að okkar meginröksemd að því leitinu til að samningurinn var útrunninn og að þeirra einhliða ákvörðun um það að gefa sjúkraþjálfurum kost á að vinna enn um stund samkvæmt samningnum fól engan veginn í sér þá viðurkenningu á því að það væri gagnkvæmur sex mánaða uppsagnarfrestur,“ segir Unnur Pétursdóttir, formaður Félags sjúkraþjálfara í samtali við Vísi.