Orðinn mjög lífhræddur

Steinþór Hróar Steinþórsson, betur þekktur sem Steindi Jr., hefur heillað þjóðina með gríni síðastliðinn áratug. Steindi er gestur vikunnar í Einkalífinu.

Steinþór býr í Mosfellsbænum ásamt unnustu sinni Sigrúnu Sig og dóttur þeirra Ronju Steinþórsdóttir. Hann segir að lífið hafi heldur betur tekið breytingum eftir að Ronja kom í heiminn og það geti eflaust verið erfitt að vera makinn hans.

„Ef ég á að vera alveg hreinskilinn þá held ég að það sé drullu erfitt. Ég er mjög gleyminn og  utan við mig en ég er líka bara skemmtilegur og hress. Það er gaman heima hjá okkur, alltaf stemning og lítið þrasað,“ segir Steindi og bætir við að hann sé alltaf að leita heima hjá sér.

„Ég spyr alltaf hvar allt er áður en ég fer að leita sjálfur. Ég veit aldrei hvar neitt er. Það er örugglega frekar þreytandi.“

Ronja kom í heiminn í maí 2014.

„Það breytti mér bara helling. Það breytir öllum að eignast barn og til góðs. Þetta er bara geggjað og í rauninni besta tilfinning í heimi. Það sem ég tek mest eftir að ég er orðinn svo lífhræddur. Ég er mikið að veislustýra og skemmta út um allt land og er farinn að vilja fara á bíl í staðinn fyrir að ferðast í flugvél.“

Í þættinum hér að ofan fer hann um víðan völl og segir áhorfendum allskonar bransasögur. Söguna hvernig hann náði að plata viðskiptamanninn Björgólf Thor til að  leika í Góðum landsmönnum og þegar David Beckham tók mynd af Steinda og Bjögga saman. Það gerði Beckham til að deila með vinuhópnum í lokaðri spjallgrúbbu til að gera grín að leikaranum Bjögga Thor. Russell Brand aðstoðaði hópinn einnig í Góðum landsmönnum. Í þættinum koma fram ótrúlegustu sögur frá Steinda en hann var einu sinni húðskammaður af Sjónvarpsstjóra Skjás Eins. Í þættinum ræðir Steindi einnig um byrjun ferilsins, ást sína á Tvíhöfða, hvað hann þyki skemmtilegast að gera í vinnu, uppáhalds þáttinn sem hann hefur unnið að, fjölskyldu sína og margt margt fleira.