Báðir mjög horaðir og annar dauður

Matvælastofnun hefur tekið páfagauk af eiganda á Norðurlandi vegna vanrækslu. Við eftirlit fundust tveir mjög horaðir fuglar í búri, þar af annar dauður. Ástand fuglanna mátti rekja til vanfóðrunar og vatnsleysis og var vörslusvipting framkvæmd tafarlaust. Þetta kemur fram í tilkynningu frá stofnuninni.

Þess er ekki getið í tilkynningu hverrar tegundar gaukarnir eru. Þá er sérstaklega tekið fram að bannað sé að beita gæludýr illri meðferð og þá sé ekki heimilt að skilja búrfugla lengur án eftirlits en í einn sólarhring. Gæta skuli þess að gæludýr sé í eðlilegum holdum og dauð dýr skuli tafarlaust fjarlægð frá lifandi dýrum.

Verið er að leita að nýju heimili fyrir páfagaukinn og er málið áfram til meðferðar hjá Matvælastofnun.