Undrast meint samráðsleysi um samgönguáætlun

Þingmaður Framsóknarflokksins kveðst undrandi yfir umræðu um meint samráðsleysi við kynningu endurskoðaðrar samgönguáætlunar. Ólíklegt þykir að það takist að afgreiða málið fyrir áramót. Sigurður Ingi Jóhannsson, samgöngu- og sveitarstjórnarráðherra, kynnti uppfærða og endurskoðaða samgönguáætlun til ársins 2034 á opnum fundi þann 17. október síðastliðinn og er hún nú í samráðsgátt. Ekki voru allir þingmenn sáttir þann stutta aðdraganda sem var að kynningunni en uppfærð samgönguáætlun hafði til að mynda ekki verið kynnt þingflokkum eða í ríkisstjórn.

Sjá einnig: Eina kynningin á uppfærðri samgönguáætlun „örkynning“ með litlum fyrirvara

Líneik Anna Sævarsdóttir, flokksystir samgönguráðherra í Framsóknarflokknum og nefndarmaður í umhverfis- og samgöngunefnd, kveðst hissa yfir öllu tali um samráðsleysi. Ferlinu sé þannig háttað að málið fari fyrst í opið samráð í samráðsgátt, áður en það kemur til kasta þingsins. „Samgönguáætlun má segja að sé allt að því samfellt samráðsferli sem gengur bara hring eftir hring,“ segir Líneik. Eins og lögin geri ráð fyrir núna sé lögð fram samgönguáætlun til fimmtán ára og framkvæmdaáætlun til fimm ára. Áætlunin sé endurskoðuð á minnst þriggja ára fresti, jafnvel oftar.

 

„Fyrsta skrefið þegar það á að endurskoða samgönguáætlun er að ráðherra leggur fjárhagsramma fyrir samgönguráð,“ segir Líneik en í ráðinu sitja fulltrúar bæði ráðherra og fagstofnana. Ráðið vinni tillögu að samgönguáætlun og skili tillögu til ráðherra sem svo fer yfir tillöguna og gerir hana að sínu ef honum sýnist sem svo. Að því búnu fari hún svo í samráð við almenning. „Þar erum við stödd núna. Þriðji liðurinn er svo eftir þetta samráð, þá fer samgönguráðherra og hans ráðuneyti aftur yfir áætlunina, gerir hugsanlega einhverjar breytingar vegna ábendinga sem koma fram í samráðinu og eftir það verður áætlunin lögð fyrir þingið,“ segir Líneik.

Ólíklegt að takist að klára fyrir áramót

Drög að samgönguáætlun til ársins 2034 eru líkt og áður segir nú í samráðsgátt og er umsagnarfrestur til 31. október sem er á fimmtudaginn. Þá á eftir að vinna úr umsögnum og eftir atvikum gera breytingar áður en áætlunin kemur til kasta þingsins. Samkvæmt starfsáætlun Alþingis er síðasti þingfundur fyrir jólafrí föstudaginn 13. desember. 

„Ég á von á því að áætlunin verði lögð fyrir þingið eftir svona mánuð. Ég get ekki fullyrt að það verði hægt að ljúka vinnunni fyrir áramót,“ segir Líneik.

Töluverð vinna framundan

„Við komum því mjög skýrt á framfæri að það væri ekki nægjanlegt fjármagn ætlað í samgöngur og það náttúrlega hefur skilað því að það eru komnir fjórir milljarðar til viðbótar árlega,“ segir Líneik, spurð hvar helstu átakalínurnar liggi í umhverfis- og samgöngunefnd um áætlunina.

Þegar nefndin var með málið til skoðunar í fyrra átti eftir að ganga frá samkomulaginu um samgönguuppbyggingu á höfuðborgarsvæðinu sem nú er komið fram. „Við erum komin með ristastór skref frá því að við lukum vinnunni við síðustu áætlun í janúar. Við erum svo að fá inn flugstefnu í fyrsta skipti og heildarstefnu í almenningssamgöngum og ég sé fyrir mér að það verði töluverð vinna að fara í gegnum það,“ segir Líneik.