36 ára gamall Lithái til liðs við Grindavík

Grindvíkingar hafa sótt sér liðsstyrk sem ætlað er að styrkja liðið undir körfunni í Dominos deild karla.

36 ára gamall litháískur framherji að nafni Valdas Vasylius mun leika með Grindvíkingum en hann kemur til liðsins frá litháíska B-deildarliðinu Silute þar sem hann hefur skorað 17,8 stig að meðaltali í fyrstu fjórum leikjunum á yfirstandandi leiktíð.

Valdas er 203 sentimetrar á hæð og hefur farið víða á löngum atvinnumannaferli. Hann hefur meðal annars leikið í Grikklandi, Póllandi, Rússlandi og Úkraínu auk þess sem hann lék í háskólaboltanum í Bandaríkjunum á árum áður.

Grindavík heimsækir Hauka í 3.umferð Dominos deildarinnar annað kvöld en Grindvíkingar töpuðu fyrstu tveimur leikjum sínum í deildinni, gegn Keflavík og KR.