Svekktur út í HSÍ

Sigursteinn Arndal, þjálfari karlaliðs FH í handbolta, er svekktur út í HSÍ fyrir lítinn liðleika vegna þátttöku FH í EHF bikarnum.

FH mætir norska liðinu Arendal á sunnudag í fyrri leik liðanna í annarri umferð EHF bikarsins. Seinni leikurinn er í Noregi sex dögum seinna, en í millitíðinni leikur FH við Hauka í Olísdeildinni á miðvikudag.

„Þetta er svakalega mikið álag, eitthvað sem við vissum að sjálfsögðu þegar við fórum í Evrópukeppnina, en það er merkilegt að skoða það að Arendal, það er bara gerð pása í deildinni hjá þeim á meðan þeir eru í þessu verkefni,“ sagði Sigursteinn í kvöldfréttum Stöðvar 2 í gær.

„En það var ekki sami viljinn fyrir hendi hér á landi. Þetta er svekkjandi.“

Arendal er sterkt lið sem lenti í öðru sæti norsku deildarinnar á síðustu leiktíð.