Sex stiga frost mældist í nótt

Vindur hreyfðist lítið á landinu í nótt og við slíkar aðstæður myndast sums staðar froststillur. Þannig frysti víða síðustu nótt, að því er segir í hugleiðingum veðurfræðings á vef Veðurstofu Íslands. Til dæmis mældist eins stiga frost bæði í Víðidal og á Akureyri en mesta frost mældist þó á Grímsstöðum, sex stig. Í nótt frystir aftur og má búast við svipuðum tölum.

Í dag verður hiti 4 til 12 stig að deginum, hlýjast suðvestanlands. Hæð er yfir Grænlandi og hryggur frá henni liggur yfir landið. Henni fylgja hægir vindar og víða bjart veður, en smáskúrir austantil á landinu síðdegis og jafnvel stöku él á Austurlandi í nótt.

Veðurhorfur á landinu

Norðlæg eða breytileg átt, 3-10 m/s og bjart með köflum. Smáskúrir á austanverðu landinu eftir hádegi og líkur á éljum austanlands í nótt. Skúrir sunnantil síðdegis á morgun, annars þurrt. Hiti 4 til 12 stig, hlýjast suðvestanlands, en víða næturfrost, einkum inn til landsins.

 

Veðurhorfur á landinu næstu daga

Á þriðjudag:

Hæg breytileg átt og bjart með köflum, en stöku skúrir sunnantil á landinu, og smáskúrir eða él austanlands. Hiti 1 til 10 stig að deginum, hlýjast á suðvestanlands.

Á miðvikudag:

Suðaustan 8-13 m/s og dálítil væta, en hægari, þurrt og bjart norðan- og austantil. Hvessir talsvert á suðvestanverðu landinu um kvöldið. Hiti 4 til 9 stig.

Á fimmtudag:

Suðaustan 13-20 m/s og rigning, hvassast með suðurströndinni, en hægari og úrkomulítið norðanlands. Hiti 5 til 10 stig.

Á föstudag:

Hvöss suðaustanátt með rigningu í flestum landshlutum, en úrkomulítið á Norðurlandi. Hiti 6 til 11 stig.

Á laugardag:

Útlit fyrir suðlægri átt með rigningu víða um land. Hiti 7 til 14 stig, hlýjast norðanlands.

Á sunnudag:

Líkur á sunnanátt með skúrum, en þurru veðri á norðanverðu landinu. Hiti 7 til 12 stig.