Ríkisstjórn Trump endurnýjar rannsókn á tölvupóstum Clinton

Fulltrúar bandaríska utanríkisráðuneytisins rannsaka nú tölvupósta stórs hóps núverandi og fyrrverandi embættismanna sem voru sendir á einkatölvupóstfang Hillary Clinton, fyrrverandi utanríkisráðherra og mótframbjóðanda Donalds Trump forseta árið 2016. Í sumum tilfellum hefur embættismönnum verið sagt að tölvupóstar þeirra hafi verið skilgreindir sem trúnaðarskjöl afturvirkt og geti nú talist öryggisbrot.

Rannsóknin á tölvupóstum Clinton þegar hún var utanríkisráðherra lék stórt hlutverk í aðdraganda forsetakosninganna árið 2016. Alríkislögreglan FBI hafði lokið rannsókn á notkun Clinton á einkatölvupóstþjóni og ályktað að ekki væri tilefni til ákæru. Umdeilt þótti að James Comey, þáverandi forstjóri FBI, ávítti Clinton fyrir að hafa farið „afar ógætilega“ með því að senda leynilegar upplýsingar um einkatölvupóstþjón sem hefðu átt að fara í gegnum dulkóðun opinberrar tölvukerfa.

Comey tilkynnti síðan um tveimur vikum fyrir kosningarnar að rannsóknin hefði verið opnuð aftur eftir að fleiri tölvupóstar fundust á tölvu fyrrverandi þingmanns Demókrataflokksins sem var til rannsóknar vegna kynferðislegra samskipta við unglingsstúlku.

Ekkert nýtt kom út úr rannsókninni á póstunum en Clinton hefur kennt tilkynningu Comey til þingsins um að rannsóknin hefði verið opnuð aftur um ósigur sinn fyrir Trump. Forskot Clinton á Trump í könnunum dróst saman eftir að bréf Comey til þingsins varð opinbert.

Gaf í skyn að hann myndi fangelsa Clinton

Í kosningabaráttunni varð Trump tíðrætt um tölvupósta Clinton og uppnefndi hann hana „Óheiðarlegu Hillary“. Hvatti hann rússnesk stjórnvöld enn fremur til að finna persónulega tölvupósta Clinton sem hafði verið eytt af tölvupóstþjóni hennar. Hótaði Trump enn fremur að rannsaka og mögulega fangelsa Clinton ef hann yrði forseti.

Washington Post greinir nú frá því að eftir að Trump tók við sem forseti árið 2017 hafi utanríkisráðuneyti hans hafið nýja rannsókn á tölvupóstum Clinton. Rannsakendur ráðuneytisins hafi byrjað að hafa samband við fyrrverandi embættismenn fyrir um átján mánuðum. Rannsóknin virðist hafa lagst í dvala um skeið en síðan tekin upp aftur af krafti í ágúst. Í sama mánuði komst ríkisstjórn Trump að því að uppljóstrari innan leyniþjónustunnar hefði lagt inn kvörtun vegna símtals hans við Volodymyr Zelenskí, forseta Úkraínu.

Alls hafi rannsakendurnir nú haft samband við allt að 130 núverandi og fyrrverandi embættismenn ráðuneytisins sem sendu tölvupósta á persónulegt póstfang Clinton þegar hún var ráðherra. Á meðal þeirra eru sendiherrar og aðstoðarráðherrar.

Í nærri öllum tilfellum er um að ræða upplýsingar sem voru sendar Clinton í tölvupóstum sem voru afturvirkt skilgreindar sem trúnaðarupplýsingar í tíð Trump-stjórnarinnar. Washington Post segir að ekkert í þeim póstum sem það hefur undir höndum hafi innihaldið viðkvæmar upplýsingar um leynileg verkefni Bandaríkjastjórnar.

Segja rannsakendurna vera afsakandi

Blaðið hefur eftir háttsettum embættismanni í utanríkisráðuneytinu að rannsóknin nú hafi ekkert að gera með að Trump sé forseti. Rannsóknin hafi einfaldlega dregist vegna þess hversu marga tölvupósta hefur þurft að fara í gengum.

Þeir sem sæta nú spurningum vegna tölvupóstana telja aftur á móti að rannsóknin sé önnur leið sem Trump forseti fari til að misnota vald sitt gegn þeim sem hann telur pólitíska andstæðinga. Demókratar í fulltrúadeild Bandaríkjaþings hófu rannsókn á mögulegum embættisbrotum Trump í síðustu viku vegna uppljóstrana um að hann hafi misnotað aðstöðu sína til að knýja pólitískan greiða út úr forseta Úkraínu í sumar. Hvíta húsið er jafnframt sakað um misnota tölvukerfi fyrir háleynilegar upplýsingar til að leyna vandræðalegum samskiptum Trump við erlenda leiðtoga.

Þannig telja sumir að rannsóknin nú sé leið fyrir Repúblikanaflokk Trump að halda deilunum um tölvupósta Clinton áfram á lífi í opinberri umræðu í aðdraganda forsetakosninga á næsta ári. Henni sé ætlað að kasta rýrð á sérfræðinga Demókrataflokksins í utanríkismálum.

Nokkrir þeirra sem hafa fengið bréf frá utanríkisráðuneytinu þar sem þeir eru sakaðir um að „bera einhverja sök“ fullyrða að rannsakendur ráðuneytisins hafi verið afsakandi og gert þeim ljóst að þeir væru að rannsaka málið tilneyddir og undir utanaðkomandi þrýstingi.

„Þeir gera sér grein fyrir hversu út í hött þetta er,“ segir einn embættismaður blaðinu.