Hafdís skrifar undir tveggja ára samning við Fram

Hafdís Renötudóttir hefur skrifað undir tveggja ára samning við Fram og mun því standa í marki liðsins í Olís-deild kvenna í vetur.

Vísir greindi frá því fyrr í dag að Hafdís væri á leiðinni til félagsins en það hefur nú verið staðfest.

Hafdís er uppalin í Fram en hún spilaði með Stjörnunni áður en ákvað að fara til Danmerkur og leika með SönderjyskE sumarið 2017.

Eftir það lék hún í Svíþjóð og var hún á leið til Póllands í sumar en það féll upp fyrir. Því er hún komin aftur heim í Safamýrina.

Fram er því komið með firnasterkt lið en liðið varð meistari meistaranna í gær eftir þrettán marka sigur á Val í Origo-höllinni, 36-23.