Inga Jóna ráðin fjármálastjóri Brims

Inga Jóna Friðgeirsdóttir hefur verið ráðin fjármálastjóri Brims og sest í framkvæmdastjórn félagsins. Á verksviði fjármálastjóra eru fjárreiður félagsins, reikningshald, upplýsingatækni og skrifstofurekstur Brims. Svo segir í tilkynningu frá Brimi.

Á hluthafafundi HB Granda hf sem haldinn var í um miðjan mánuðinn var samþykkt að nafni félagsins skuli breytt. Það heitir nú Brim hf. Jafnframt hefur merki félagsins verið breytt.

Inga Jóna hóf störf hjá HB Granda 2013 sem forstöðumaður fiskþurrkunar og síðar forstöðumaður viðskiptaþróunar. Áður eða frá árinu 2004 starfaði hún sem framkvæmdastjóri Laugafisks og jafnframt sem framkvæmdastjóri hjá Brimi (nú Útgerðarfélag Reykjavíkur) frá 2007-2013.

Inga Jóna útskrifaðist með B.sc gráðu í alþjóðlegri markaðsfræði frá Tækniháskólanum árið 1998 en hafði áður lokið iðnrekstrarfræði frá sama skóla.  Hún er með MBA gráðu frá Háskólanum í Reykjavík og diplóma af meistarastigi í jákvæðri sálfræði frá EHÍ.