Jón Pétur Zimsen mun láta af störfum sem aðstoðarmaður Lilju Alfreðsdóttur menntamálaráðherra 15. ágúst næstkomandi. Þetta kemur fram í tilkynningu frá menntamálaráðuneytinu. Hann mun hefja aftur störf í Réttarholtsskóla, þar sem hann var skólastjóri.
Tilkynnt var um ráðningu Jóns Péturs í ágúst í fyrra. Í tilkynningu menntamálaráðuneytisins nú segir að hann hafi starfað sem „tímabundinn“ aðstoðarmaður mennta- og menningarmálaráðherra og sinnt verkefnum á menntaskrifstofu ráðuneytisins.
Hann kom meðal annars að vinnu við undirbúning löggjafar um eitt leyfisbréf fyrir kennara sem taka mun gildi í ársbyrjun 2020, aðgerðum er miðað að fjölgun kennara, undirbúningi menntastefnu til ársins 2030 og endurskoðun aðalnámsskrár grunnskóla og mati á innleiðingu hennar.
„Jón Pétur Zimsen mun hefja aftur störf í Réttarholtsskóla í Reykjavík en sinnir áfram verkefnum sem tengjast endurskoðun aðalnámsskrár og eflingu starfsumhverfis kennara,“ segir í tilkynningu ráðuneytisins.
Jón hættir að aðstoða Lilju og snýr aftur í Réttó
Tengdar fréttir
Segist talsmaður barna í ráðuneytinu
Jón Pétur Zimsen, fyrrverandi skólastjóri Réttarholtsskóla, er nýráðinn aðstoðarmaður Lilju Alfreðsdóttur, menningar- og menntamálaráðherra. Hann vill tryggja lágmarksþekkingu barna eftir tíu ára skólagöngu.
Jón Pétur aðstoðar Lilju
Jón Pétur Zimsen hefur verið ráðinn aðstoðarmaður Lilju Alfreðsdóttur mennta- og menningarmálaráðherra.
