Strunsaði brjálaður út úr Hallgrímskirkju vegna fána

Ferðamaður frá Bandaríkjunum strunsaði út úr Hallgrímskirkju í dag. Ástæðan var sú að honum blöskraði fáni sem lá á kórtröppunum og blasti við söfnuði og öllum þeim sem komu í hlið himins, eins og það er orðað á heimasíðu Hallgrímskirkju.

Fáninn sem um ræðir er regnbogafáninn sem sjá má víða í höfuðborginni sem og annars staðar á landinu í tilefni Hinsegin daga sem haldnir eru í tuttugasta skiptið í ár. 

Óhætt er að segja að fyrrnefndur ferðamaður sé enginn aðdáandi fánans. Eftir að hafa starað á fánann rauk hann út úr kirkjunni og fram í Guðbrandsstofu, í anddyri kirkjunnar.

Þar var kirkjuvörður fyrir svörum.

Gestur: „Afsakaðu, en er þetta regnbogafáni í kirkjunni?“

Kirkjuvörður: „Já, það er rétt.“

Gestur: „Af hverju ætti hann að vera í kirkju?“

Kirkjuvörður: „Af því að við teljum að kærleikur guðs nái til allra óháð kynhneigð þeirra eða uppruna.“

Gestur: „Jesús hefði aldrei tekið þetta í mál.“

Kirkjuvörður: „Jú, það hefði hann.“

Gestur: „Nei, það hefði hann ekki gert.“

Kirkjuvörður: „Jæja, við verðum að vera ósammála um það“

Gestur: „Þetta er ekki kristin kirkja. Þetta er til skammar!“

Fór svo að gesturinn strunsaði út úr kirkjunni.

Á síðu Hallgrímskirkju á Facebook kemur fram að kirkjan standi með fjölbreytileika og litríki lífsins. Hinsegin dagar hófust í vikunni og ná hápunkti með gleðigöngu á laugardaginn.