Stór­tón­leikar til styrktar flótta­fólki í Prik­porti

Samtökin No Borders standa fyrir stórtónleikum á Prikinu á morgun þar sem margir vinsælustu tónlistarmenn landsins koma fram. Tónleikarnir fara fram í portinu við Prikið og hefjast klukkan 16 og standa til klukkan 21.

Á tónleikunum koma fram Sturla Atlas, Birnir, Saga Nazari, Joey Christ, Alvia, Gróa, Cultural Cypher, Countess Malaise og JóiPé & Króli. Rebecca Lord verður kynnir á tónleikunum.

Með tónleikunum er vakin athygli á stöðu flóttamanna og hælisleitenda hér á landi og brottvísunum þeirra mótmælt. Í yfirlýsingu frá aðstandendum tónleikanna segir að haldið verði áfram að mótmæla þeirri einangrun og aðskilnaðarstefnu sem flóttamenn á Íslandi eru beittir af hálfu yfirvalda. Þau vilji jafnframt eiga samtal við Katrínu Jakobsdóttur forsætisráðherra strax.

„Fyrir hinu íslenska ríki eru þau kölluð hin pappíralausu. Þau eru hin raddlausu og hin andlitslausu. Það sem gerst hefur síðustu mánuði er allsherjar neitun á þessari hlutgervingu. Flóttafólk á Íslandi stóð upp og neitaði að láta hlutgera sig áfram,“ segir í yfirlýsingu samtakanna. 

Frítt verður inn á tónleikana en tekið verður á móti frjálsum framlögum sem renna óskert til starfsemi No Borders. 

Hér að neðan má lesa yfirlýsingu samtakanna í heild sinni: 

Fyrir hinu íslenska ríki eru þau kölluð hin pappíralausu. Þau eru hin raddlausu og hin andlitslausu.

Það sem gerst hefur síðustu mánuði er allsherjar neitun á þessari hlutgervingu. Flóttafólk á Íslandi stóð upp og neitaði að láta hlutgera sig áfram.

Í andófi gegn yfirvaldi er fyrsta skrefið að færa sig frá því að vera hlutur í eigu og augum þessa valds, í að verða manneskja, að verða gerandi, að verða frjáls í hugsun og anda.

Flóttafólk og anarkistar söfnuðust saman viku eftir viku, dag eftir dag og settu fram skýrar kröfur. Svívirðilegum gjörðum íslenskra og vestrænna yfirvalda var mótmælt.

Við höfum mótmælt á Keflavíkurflugvelli, hjá Útlendingastofnun, fyrir framan Alþingi og á götum Reykjavíkur. Systkini okkar mótmæla í hinu svokallaða Frakklandi og veita áframhaldandi fangelsun, þrælkun og fordæmingu fólks af afrískum og miðausturlenskum uppruna mótspyrnu. Við sækjum innblástur í hreyfingu þeirra og hugrekki.

Við munum halda áfram að berjast gegn rasisma ríkisins.

Við munum halda áfram að verja sæmd okkar.

Við munum ekki hlýða yfirvaldinu vegna þess að það eina sem það hefur upp á sig er að svipting allra okkar réttinda.

Kjörorð Íslands í dag þegar kemur að útlendingum eru: niðurlæging, misnotkun og brottvísun.

Ísland, sem borgar milljarða til hernaðarrekstrar NATÓ sem herja vopna- og efnahagsstríð á landsvæðin sem fólk flýr.

Ísland, sem er í stríði gegn innflytjendum, hér og nú.

Við komum saman á laugardaginn til að fagna frelsinu sem felst í virku andófi, til að minna á að baráttan heldur áfram og til að fræða fólk um aðstæður flóttafólks á Íslandi.

Við berjumst fyrir því að bundinn sé endi á þá einangrun og aðskilnaðarstefnu sem flóttamenn á Íslandi eru beitt af hálfu yfirvalda!

Við berjumst ekki einungis fyrir pappírum fyrir alla, heldur gegn þessu kerfi sem býr til pappíralausa einstaklinga, sem býr til svokallaða ólöglega einstaklinga.

Það er ljóst að innanríkisráðuneytið vill ekki breyta stefnu sinni þegar kemur að málum flóttafólks.

Þegar þau breyta einhverju, gera þau það til skamms tíma og fyrir örfáa,líkt og sást í tilfelli barnanna sex sem fengu málið sitt til enduropnað eftir að þúsundir manna fylltu götur miðbæjar Reykjavíkur.

Við viljum tala við Katrínu Jakobsdóttir, forsætisráðherra, núna strax!

Við munum halda áfram að berjast þar til að landamæri verða að engu og yfirvaldið fellur um eigin græðgi.

Fyrir öll þau sem berjast gegn kúgun, hér og annarsstaðar!

Fyrir öll þau sem trúa því að engin manneskja sé ólögleg!

Fyrir öll þau sem vita að barátta gegn rasisma í dag, er barátta gegn rasisma fyrri tíma og komandi tíma!

Ekki fleiri brottvísanir!

Ferða- og búsetufrelsi fyrir alla!

Lifi barátta hinna frjálsu og villtu!