Skýrsla um Íslandspóst opinberuð í dag

Skýrsla Ríkisendurskoðunar um Íslandspóst ohf. verður opinberuð í dag að loknum sameiginlegum fundi fjárlaga­nefnd­ar og stjórnskipunar- og eftirlitsnefndar. Ákveðið var að biðja Ríkisendurskoðun um að gera úttekt á málefnum fyrirtækisins í janúar síðastliðnum. Málefni Íslandspósts hafa verið til umræðu síðustu mánuði eftir að fyrirtækið óskaði eftir 1,5 milljarða neyðarlánveitingu frá ríkinu. Ingimundur Sigurpálsson sagði af sér sem forstjóri í vor eftir 15 ára starf.

Skýrsla Ríkisendurskoðunar var tilbúin í síðustu viku en ákveðið var að hún skyldi ekki opinberuð fyrr en ríkisendurskoðandi hefur gert grein fyrir henni á fundum þingnefndanna.