Leikarinn Jóhannes Haukur og gagnrýnandinn Tómas etja kappi í spurningakeppni

Fornir fjendur mætast í kvikmyndaspurningakeppni sem hefur hafið göngu sína í útvarpsþættinum Stjörnubíói, sem er á dagskrá X977 alla sunnudaga klukkan 12:00.

Kvikmyndagerðarfólk á í þversagnarkenndu sambandi við gagnrýnendur. Það elskar þá ef dómarnir eru jákvæðir, en ef dómarnir eru slæmir er ekki það sama uppi á teningnum.

Heiðari Sumarliðasyni, gestgjafa útvarpsþáttarins Stjörnubíós, þótti því tilvalið að færa orrustuna af klósettum öldurhúsanna yfir á öldur ljósvakans.

Stjörnubíó hefur hleypt af stokkunum kvikmyndaspurningakeppni í Gettu betur stílnum, þar sem fólk úr kvikmyndabransanum mætir sínum helsta fjanda, kvikmyndagagnrýnandanum. Í fyrsta þætti takast á Jóhannes Haukur Jóhannesson, leikari og aktívisti, og Tómas Valgeirsson, kvikmyndaspekúlant DV.

Ætla mætti að atvinnukvikmyndaáhugamaðurinn Tómas ætti að sigra leikarann auðveldlega, en annað kom á daginn. Jóhannes er hafsjór af tilgangslausri þekkingu um kvikmyndasöguna, því sýnd veiði en ekki gefin.

Í næstu viku verða það Þórarinn Þórarinsson, gagnrýnandi og Hrafnkell Stefánsson, handritshöfundur sem heyja orrustu. Að endingu verður svo krýndur kvikmyndaspekúlant Íslands.

Hér að neðan má hlusta á fyrstu viðureignina.