Hörmungar heimaliðsins í fyrsta leik lokaúrslitanna héldu áfram í gær

Í sjöunda skiptið á níu árum tapar heimaliðið fyrsta leik í lokaúrslitunum í úrslitakeppni karla í handbolta.

Það hefur reynst heimaliðunum erfitt að vinna fyrsta leik í lokaúrslitum handboltans undanfarin tímabil. Aðeins tveimur af síðustu níu hefur tekist það.

Selfyssingar stálu heimavallarréttinum í gær í fyrsta leik úrsliteinvígis síns á móti Haukum í úrslitakeppni Olís deildar karla í handbolta.

Selfoss er sjöunda útiliðið á síðustu níu árum sem vinnur fyrsta leik lokaúrslitanna og fimm af hinum sex hafa síðan farið alla leið og unnið Íslandsmeistaratitilinn.

Einu heimaliðin sem hafa unnið fyrsta leik í lokaúrslitum frá 2011 eru lið ÍBV í fyrra og lið Hauka frá 2014. Haukaliðið frá 2014 tapaði titlinum með tapi fyrir ÍBV í oddaleik á heimavelli.

Gunnar Magnússon var líka þjálfari Haukaliðsins sem komst yfir það að byrja lokaúrslitin svona illa.

Haukaliðið frá árinu 2016 eru nefnilega eina liðið í sögu úrslitakeppninnar sem hefur komið til baka eftir svona áfall.

Haukar urðu Íslandsmeistarar vorið 2016 þrátt fyrir að tapa fyrsta leik á heimavelli á móti Aftureldingu. Haukarnir jöfnuðu metin með sigri í Mosfellsbænum í leik tvö og unnu svo einvígið í oddaleik sem var jafnframt eini heimsigur Haukanna í úrslitaeinvíginu.

Öll hin átta heimaliðin í sögu úrslitakeppni karla sem hafa tapað leik eitt á heimavelli í lokaúrslitunum hafa þurft að sætta sig við silfurverðlaun.

Fyrsti leikur lokaúrslitinna frá 2011 til 2019:

Leikir: 9

Heimsigrar: 2 (2014, 2018)

Útisigrar: 7 (2011, 2012, 2013, 2015, 2016, 2017, 2019)

Mörk heimaliðs að meðaltali: 24,7

Mörk útiliðs að meðaltali: 26,0

Nettó: Útilið +12

Félög sem hafa tapað fyrsta leik á heimavelli í lokaúrslitum í úrslitakeppni karla í handbolta (1992-2005, 2009-):

Haukar 2019 - ???

FH 2017 - tapaði 3-2 á móti Val

Haukar 2016 - vann 3-2 á móti Aftureldingu

Afturelding 2015 - tapaði 3-0 á móti Haukum

Haukar 2013 - töpuðu 3-1 á móti Fram

FH 2012 - tapaði 3-0 á móti HK

Akureyri 2011 - tapaði 3-1 á móti FH

Fram 1998 - tapaði 3-1 á móti Val

KA 1996 - tapaði 3-1 á móti Val

Haukar 1994 - töpuðu 3-1 á móti Val