Saksóknarar í Danmörku hafa ákært Thomas Borgen, fyrrverandi forstjóra Danske bank, persónulega vegna aðildar hans að stórfelldu peningaþvætti sem fór fram í gegnum útibú bankans í Eistlandi. Þá er lögregla sögð hafa gert húsleit á heimili Borgen í mars.
Frá þessu segir danska viðskiptablaðið Børsen í dag. Lögmaður Borgen staðfestir ákæruna og að efnahagsbrota- og alþjóðadeild ríkissaksóknara Danmerkur hafi gert húsleit hjá honum 12. mars. Saksóknaraembættið hefur ekki viljað staðfesta eða hafna fréttunum, að sögn danska ríkisútvarpsins.
Grunur leikur á að um 1.500 milljarðar danskra króna, jafnvirði um 27.500 milljarða íslenskra króna, hafi verið þvættaðar í gegnum útibú Danske bank í Eistlandi á um áratugi. Rannsóknin hefur meðal annars beinst að því hvort að stjórnendur bankans gætu borið persónulega ábyrgð á brotunum.
Heimildir Børsen herma að tveir aðrir fyrrum stjórnendur Danske bank hafi verið ákærðir í tengslum við peningaþvættið.
Borgen, sem er norskur, tók við sem forstjóri Danske bank árið 2013 eftir áralangt starf fyrir bankann. Hann sagði af sér í september vegna peningaþvættishneykslisins. Þá sagðist hann hafa sýnt af sér ábyrgðarleysi og að hann vildi axla ábyrgð með því að segja af sér.
Hneykslið hefur einnig náð til fleiri norrænna fjármálastofnana eins og sænska bankans Nordea. Talið er að hluti af grunsamlegum fjármagnsfærslum sem fóru í gegnum eistneska útibú Danske bank hafi einnig runnið í gegnum sænska bankann.
