Formaður dómaranefndar KKÍ: Dómararnir gerðu mistök | Myndband

Jón Bender, formaður dómaranefndar KKÍ, segir að dómarar leiks KR og ÍR í gær hefðu gert mistök undir lok venjulegs leiktíma. Þá hefði KR átt að fá vítaskot en fékk ekki.

Það var dæmd villa á ÍR-inginn Sigurð Gunnar Þorsteinsson fyrir brot á KR-ingnum Helga Má Magnússyni. Villa og tvö víti var upprunalegi dómurinn.

Eftir að hafa skoðað atvikið á myndbandi ákváðu dómararnir að breyta villunni í sóknarvillu þannig að Helgi fékk ekki vítaskotin. Staðan var þá jöfn og 1,6 sekúnda eftir. Ef Helgi hefði sett vítin niður hefði leikurinn hugsanlega ekki farið í framlengingu. Félagar hans klúðruðu reyndar fjórum vítum í röð í framlengingunni.

„Það voru gerð mistök. Það er bara þannig,“ segir Jón Bender, formaður dómaranefndar KKÍ, við Vísi. „Það var enginn að leika sér að því að gera mistök. Það er alveg ljóst.“

Jón segir að það sé ákveðið flækjustig á reglunum sem hafi ruglað dómarana.

„Liðsvaldi ÍR á boltanum lýkur er Boyd ver skotið skömmu fyrir villuna. Skotklukkan er þó enn í gangi og það er til skotklukkuregla. KR átti að fá tvö víti þarna.“

Dómararnir breyttu þessum dómi eftir að hafa skoðað atvikið á myndbandi eins og áður segir. Dómarar hafa ekki heimild í leikreglunum til þess að nota endursýningar til þess að breyta villu yfir í sóknarvillu.

„Þarna er fólk aðeins að ruglast. Þetta er einfalt. Þeir eru ekki að breyta í sóknarvillu í þeim skilningi. Forsendurnar sem fólk er að gefa sér eru ekki réttar. Þeir voru að fara yfir hvort það væri enn liðsvald eða ekki. Þeir voru ekki að fara að skoða hvort þeir gætu breytt í sóknarvillu. Sú regla snýst um allt annan hlut en þetta,“ segir Jón og bætir við.

„Þeir eru að fara yfir reglur um liðsvaldið, sem er allt önnur regla, og ef það er ekki liðsvald þá er þetta villa og tvö víti. Liðsvaldi lýkur er leikmaður tekur skot. Þetta lítur út eins og þeir séu að breyta varnarvillu í sóknarvillu en þeir eru að horfa út frá liðsvaldi og þá er hægt að breyta. Mistökin voru að átta sig ekki á því að liðsvaldinu lýkur með skotinu.“

Staðan í einvígi liðanna er nú 2-1 fyrir ÍR sem getur tryggt sér Íslandsmeistaratitilinn á fimmtudag. Ef KR hefur betur í þeim leik verður oddaleikur næstkomandi laugardag.

Hér að neðan má sjá villuna sem Rögnvaldur dæmdi en Kristinn breytti svo í sóknarvillu.