Gera ráð fyrir lægð á föstudag

Engar markverðar breytingar verða á veðrinu næstu daga og helst veðrið svipað fram eftir vikunni. Það er ekki fyrr en á föstudag sem lægð er í kortunum með vaxandi vindi og úrkomu að því er kemur fram í veðurpistli vakthafandi veðurfræðings á Veðurstofu Íslands.

Austlæg átt verður ríkjandi á landinu í dag, stífur vindur allra syðst en annars hægari. Léttskýjað verður norðan-og vestanlands en skýjað og yfirleitt þurrt um landið suðaustanvert.

Á morgun er þá gert ráð fyrir að veðrið breytist mjög lítið en þó má búast við aðeins meiri úrkomu á suðausturhluta landsins. Fremur milt yfir daginn en hiti um og undir frostmark að næturlagi og þá kaldast í innsveitum.

Veðurhorfur á landinu næstu daga.

Á mánudag:

Suðaustan 3-8 m/s, en austan 10-15 syðst á landinu. Skýjað að mestu og úrkomulítið, en léttskýjað um landið norðvestanvert. Hiti 2 til 8 stig að deginum.

Á þriðjudag og miðvikudag:

Austlæg átt 3-8 m/s, en 10-15 með suðurströndinni. Skýjað og lengst af þurrt sunnan- og austantil, annars víða léttskýjað. Hiti 3 til 8 stig að deginum, en næturfrost í flestum landshlutum.

Á fimmtudag:

Suðaustan átt, yfirleitt skýjað og stöku skúrir eða él suðaustantil, en bjartviðri á norðvestanverðu landinu. Hiti breytist lítið.

Á föstudag:

Útlit fyrir hvassa suðaustanátt og rigningu, en þurrt um norðanvertvert landið. Hlýnar í veðri.

Á laugardag:

Suðlæg átt og rigning eða skúrir en léttskýjað norðanlands. Hiti 3 til 8 stig.