Lög­regla varar við tölvu­póstum í nafni CIA

Lögreglan á höfuðborgarsvæðinu varar við nýju formi af netglæpum þar sem verið að senda tölvupósta í nafni bandarísku leyniþjónustunnar, CIA.

Í tilkynningu frá lögreglunni segir látið sé líta út fyrir að viðtakandi póstsins tengist rannsókn CIA á barnaklámi. Að því leyti sé pósturinn frekar ógeðfelldur.

„Þetta er fjölpóstur og ekki hafa áhyggjur, póstinum fylgir ekki óværa og ekki gera neitt. Hann er sendur til að vekja hræðslu í von um að fólk borgi af ótta en ekkert er hæft í efni póstsins og ef vel er gáð þá má sjá að pósturinn er uppruninn í Gabon, [Mið-Afríkulýðveldinu], Malí eða öðru ríki og hefur ekkert með CIA að gera.

Auðvitað er óþægilegt að fá slíkan póst en við biðjum fólk að halda ró sinni.

Ef fólk er að fá slíka pósta þá biðjum við það að senda þá til okkar á cybercrime@lrh.is eða hingað á Facebook,“ segir í tilkynningunni frá lögreglunni.