Tilfinningaþrungið viðtal Oprah Winfrey við mennina á bakvið Leaving Neverland

Tveir menn lýsa grófum kynferðisbrotum bandaríska söngvarans Michael Jacksons gegn þeim í nýrri heimildarmynd, Leaving Neverland, sem HBO sýndi í tveimur hlutum 3. og 4. mars.

Mennirnir halda því fram að Jackson hafi misnotað þá þegar þeir voru börn og rekja brotin í miklum smáatriðum í myndinni.

Jackson lést árið 2009 en ásakanir um meint kynferðisbrot hans gegn ungum drengjum hafa lengi loðað við hann og feril hans. Hann þvertók þó ætíð fyrir allt slíkt á meðan hann lifði.

Þekktasta dæmið er líklega frá árinu 1993 en þá var hann sakaður um að hafa brotið á Jordy Chandler, þrettán ára pilti, árið 1993 og vakti málið heimsathygli. Jackson og fjölskylda Chandler komust loks að samkomulagi um sáttagreiðslu upp á 23 milljónir Bandaríkjadala.

Bandaríska sjónvarpskonan Oprah Winfrey boðaði fórnarlömb kynferðisofbeldis í myndver þar sem yfir hundrað manns horfðu á umrædda fjögurra tíma heimildarmynd saman. Eftir myndina komu þeir Wade Robson og James Safechuck ásamt Dan Reed, leikstjóri myndarinnar, fram saman og tók Winfrey tilfinningaþrungið viðtal við þremenningana.

Í viðtalinu opna þeir Robson og Safechuck sig um það ofbeldi sem Michael Jackson á að hafa beitt drengina. Safechuck segist hafa fengið hugrekki til að stíga fram þegar hann sá Wade Robson tjá sig í fjölmiðlum með því að segja sína sögu.

Viðtalið stóð yfir í um eina klukkustund og er farið um víðan völl í því. Robson og Safechuck eiga greinilega erfitt að rifja upp tímann með tónlistarmanninum eins og sjá má hér að neðan. Í viðtalinu er einnig rætt við sálfræðinga og önnur fórnarlömb kynferðisofbeldis.