Skipt um forstjóra hjá kísilmálmverksmiðju PCC

Rúnar Sigurpálsson, framkvæmdastjóri kísilmálmverksmiðju PCC á Bakka við Húsavík, tekur við sem forstjóri hennar af Jökli Gunnarssyni í apríl. Jökull var ráðinn forstjóri í haust en segist stíga til hliðar nú af persónulegum ástæðum.

Ríkisútvarpið greindi frá því nú síðdegis að starfsmönnum verksmiðjunnar hafi verið tilkynnt um forstjóraskiptin á fundi í dag. Það hefur eftir Jökli að hann hafi ákveðið að flytja aftur heim á suðvesturhornið.

Þá segir hann við RÚV að ýmsar bilanir og vandræði sem hafi gert aðstandendum verksmiðjunnar lífið leitt frá því að hún var gangsett síðasta vor hafi ekki verið ástæða þess að hann lét af störfum.