Tólf snjóflóð síðasta sólarhringinn fyrir austan

Tólf snjóflóð hafa fallið síðasta sólarhringinn á Austfjörðum samkvæmt skrá Veðurstofu um snjóflóðatilkynningar. Alls hafa 32 snjóflóð fallið á öllu landinu síðustu tíu daga.

Starfsmaður á snjóflóðavakt segir í samtali við RÚV að þetta séu smærri flóð efst í fjöllum. Það séu helst útivistarfólk á vélsleðum, á fjallgöngu eða á gönguskíðum sem þurfi að hafa varann á.

Talsvert nýsnævi er til fjalla á landinu eftir éljagang undanfarna viku. Snjór hefur safnast í skafla hlémegin í landslagi og víða er bert á milli. Veik lög geta verið í og undir nýja snjónum að því er fram kemur á vef Veðurstofunnar um mat á snjóflóðaaðstæðum.