Verða snarruglaðir fyrir sunnan ef eitthvað á að gera fyrir Vestfirði

Skiptar skoðanir eru meðal íbúa Árneshrepps um hvort Hvalárvirkjun muni styðja við heilsársbyggð í hreppnum. Íbúar upplifa deilur um virkjunina, sem nú er í skipulagsferli, þannig að fólk fyrir sunnan vilji taka völdin af heimamönnum. Þetta kom fram í fréttum Stöðvar 2 og í þættinum „Um land allt“. 

Í Árneshreppi bjuggu yfir fimmhundruð manns fyrir miðja síðustu öld. Þar hafa heilu þorpin farið í eyði og nú standa íbúar frammi fyrir þeirri ógn að allur hreppurinn hljóti sömu örlög.

Við fórum að Hvalá í haust með Pétri Guðmundssyni, bónda í Ófeigsfirði, og spurðum hvort virkjun gæti hjálpað samfélaginu. 

„Hún getur hjálpað því. Það hefði verið betra að fá hana fyrr. En hún er alveg lykilatriði fyrir Vestfirðinga,“ svarar Pétur. 

„Svo teljum við að þetta myndi kalla á betri samgöngur,“ segir Eva Sigurbjörnsdóttir oddviti.

„Ég er alfarið á móti henni. Hún skapar ekki neina vinnu hérna og ekki neitt,“ segir Jóhanna Ósk Kristjánsdóttir, bóndi í Árnesi 2.

„Hvalárvirkjun gerir ekkert hér fyrir heilsárbúsetu,“ segir eiginmaðurinn Ingólfur Benediktsson. 

„Almennt séð er ég ekki hlynnt þessari virkjun af því að ég held að hún styðji ekki við byggðina,“ segir Elín Agla Briem, þjóðmenningarbóndi og hafnarstjóri Árneshrepps.

Fossinn Drynjandi er af andstæðingum sagður sá tilkomumesti af þeim sem skerðist en bóndinn í Ófeigsfirði telur ávinninginn meiri. 

„Það má aldrei gera neitt fyrir Vestfirði. Það má ekki virkja, það má ekki leggja veg, það má ekki gera neitt sem skapar atvinnu. Þá verður þetta vitlausa lið fyrir sunnan snarruglað,“ segir Pétur.

„Þetta er aðalmálið fyrir mér; að það geti ekki einhver vitleysingur sunnan úr Garðabæ, með bláan plastpoka í hendinni, með fimm milljónir í poka, komið og sagt mér hvað ég megi gera við jörðina mína og hvað ekki.

Þetta er bara rosastórt prinsippmál. Þessu rugli þarf að eyða,“ segir Guðlaugur Ágústsson, bóndi á Steinstúni. 

„Það er eins og það séu einhver öfl í samfélaginu sem vilja bara ekkert með þetta hafa hérna. Þetta eigi bara að fara í eyði,“ segir Ásbjörn Þorgilsson, staðarhaldari í Djúpavík.

„Við erum bara að framfylgja því sem rammaáætlun taldi upp og þingheimur samþykkti,“ segir Júlía Fossdal, bóndi á Melum.

Pétur í Ófeigsfirði rifjar upp að þegar framkvæmdir voru á Austurlandi hafi Fjórðungssambandið lýst Vestfirði stóriðjulausa að áeggjan náttúruverndarfólks. 

„Það taldi ekkert mál að koma með 750 störf. Þeir ætluðu að gera það fyrir austan, koma með 750 störf, ef það yrði hætt við Kárahnjúka. 

Það hefur ekki komið eitt einasta starf á vegum þessara manna. Þetta er tómt helvítis blaður. Ekkert einasta starf. Þeir koma ekki með neitt,“ segir Pétur. 

Hér má sjá frétt Stöðvar 2: