Landsréttur staðfestir niðurstöðu Héraðsdóms í Klaustursmálinu

Landsréttur hefur staðfest úrskurð Héraðsdóms Reykjavíkur í máli hóps þingmanna Miðflokksins gegn Báru Halldórsdóttur vegna Klaustursmálsins svokallaða. Þingmennirnir fóru fram á að vitnaleiðslur færu fram í dómsal og að sönnunargagna yrði aflað en nú hafa tvö dómstig hafnað því. Þetta kemur fram á vef Stundarinnar og segir þar að málskostnaður falli á þingmennina.



Um er að ræða þingmennina Bergþór Ólason, Gunnar Braga Sveinsson, Sigmund Davíð Gunnlaugsson og Önnu Kolbrúnu Árnadóttur. Í kærunni kemur fram að ýmislegt gefi til kynna einbeittan brotavilja Báru, að um fyrirframgefið markmið hafi verið að ræða að taka samtalið upp.

Sjá einnig: Þingmenn Miðflokks fara með málið fyrir Landsrétt



Reimar Pétursson, lögmaður fjögurra þingmanna Miðflokksins, segir að brotið hafi verið á rétti þingmannanna til einkalífs með því að taka upp samtal þeirra á barnum Klaustur við Austurvöll þann 20. nóvember.

Þar að auki hefur hann sagt að til sé myndefni úr eftirlitsmyndavélum Alþingis og Dómkirkjunnar sem gæti varpað ljósi á málið og nauðsynlegt hafi verið að tryggja tilvist þess.

Bára steig upprunalega ekki fram undir nafni eftir mótmæli á Austurvelli í byrjun desember fannst henni mikilvægt að stíga fram og fannst það skipta máli að fólk væri meðvitað um að sú sem tók upp væri manneskja sem orðin beindust með óbeinum hætti gegn og blöskraði framferði þingmannanna.