Snjór fyrir jól ekki í kortunum

Gul viðvörun er í gildi vegna mikils hvassviðris á Suður- og suðausturlandi í dag og gætu hviður farið yfir 40 metra á sekúndu. Búist er við hæglátara veðri um jólin að sögn veðurfræðings og stefnir víðast hvar í rauð jól, nema þar sem þegar er snjór. Elín Margrét Böðvarsdóttir

Seinnipartinn og undir kvöld í dag er búist við aftakaveðri, einkum á suður- og suðausturlandi. Daníel Þorláksson er vakthafandi veðurfræðingur hjá Veðurstofunni.

„Það er sem sagt djúp lægð hérna suður af landi og hún kemur upp að landinu í kvöld og það hvessir sökum hennar um sunnanvert landið í kvöld. Staðbundið fer það upp í storm og rok eins og suður af Eyjafjöllum, vestur af Öræfajökli og vestur fyrir Eyjafjöllin.“

Vindur verður mun hægari annars staðar á landinu og er búist við að veðrið nái hámarki um níu- tíu leytið í kvöld og verði að mestu gengið yfir fljótlega eftir það. Gul viðvörun er í gildi á Suðurlandi og Suðausturlandi og á það einkum við um svæðið milli Eyjafjallajökuls og Öræfajökuls þar sem veðurhamurinn er mestur.

„Það verður engin snjókoma með þessu á láglendi en það er það hvasst að það er mjög varasamt að keyra í þessu.“

Hvernig er útlitið hvað varðar jólaveðrið?

„Í raun og veru eru ekki að vænta mikillar úrkomu og það litla sem fellur verður langmest rigning eða slidda á láglendi. Ég myndi halda að þar sem snjórinn liggur ekki núna þar bæti nú lítið í. Þar sem er hvítt núna gæti verið hvítt um jólin,“ segir Daníel Þorláksson, veðurfræðingur hjá Veðurstofu Íslands.