SA segir fullkomlega ótímabært að vísa kjaradeilu til ríkissáttasemjara

Það gæti dregið til tíðinda við samningaborð verkalýðshreyfingarinnar og Samtaka atvinnulífsins á fundi samninganefndar Eflingar sem hófst klukkan sex varðandi áframhaldandi samflot með öðrum félögum innan Starfsgreinasambandsins. Útilokað er að kjarasamningar takist áður en gildandi samningar renna út um áramót.

Aðilar bæði almenna og opinbera vinnumarkaðarins komu til þrettánda samráðsfundur þeirra með stjórnvöldum í Ráðherrabústaðnum í dag. Fyrir liggur að formenn að minnsta kosti sjö af nítján aðildarfélögum Starfsgreinasambandsins telja viðræður um nýjan kjarasamning ganga allt of hægt og vilja vísa deilunni strax til Ríkissáttasemjara.

Halldór Benjamín Þorbergsson framkvæmdastjóri Samtaka atvinnulífsins telur vænlegra að halda viðræðum áfram án aðkomu ríkissáttasemjara.

„Ég held að það sé fullkomlega ótímabært að vísa þessari deilu til ríkissáttasemjara og ég hef gengið svo langt að segja að ég telji það óskynsamlegt á sama tíma. Við erum rétt búin að funda sjö sinnum með deiluaðilum, SGS og VR og þar erum við rétt búin að ávarpa þessa stærstu þætti í kröfugerðinni,” segir Halldór Benjamín.

Nær útilokað er að kjarasamningar takist áður en gildandi samningar á almenna markaðnum renna út um áramótin en Halldór segir markmiðið að klára samningagerðina í janúar.

Finnst ykkur hjá Samtökum atvinnulífsins að þið séuð að tala við forystu sem er ekki alveg sameinuð hinum megin við samningaborðið?

„Ég held að við verðum bara að sjá hvernig það mun þróast núna á næstu dögum. Hins vegar breytir það því ekki að það sem er aðalatriðið í þessu er hver er gangurinn í hagkerfinu og hvað er til skiptanna í þessu samfélagi á næstu mánuðum og árum,” segir Halldór Benjamín.

Verðmæti verði ekki til með kjarasamningum heldur séu þeir til að skipta verðmætum segir Halldór. Þar talar hann á svipuðum nótum og Bjarni Benediktsson fjármálaráðherra sem sagði í viðtali við Morgunblaðið að ríkisstjórnin muni endurskoða áform um skattalækkanir verði samið á óraunhæfum nótum.

Var það ekki óhentug sprengja á þessum tímapunkti?

„Nei eru þetta ekki bara augljós sannindi? En ég er ekkert að spá því að menn semji ekki skynsamlega. Það hljóta að vera allar líkur á því að menn leiti leiða til að ráðstafa því svigrúmi sem er til staðar. En ef menn enda með samninga sem samrýmast ekki stöðunni í hagkerfinu er það skylda stjórnvalda að bregðast við því,” segir Bjarni.

Drífa Sædal forseti Alþýðusambandsins segir niðurstöðu ekki komna í skatta- og húsnæðismál sem muni ráða mestu um hvernig takist til við kjarasamninga.

Yfirlýsingar fjármálaráðherra varðandi mögulegar skattalækkanir og útkomu kjarasamninga, eru þær til að auðvelda málin?

„Það að hóta vinnandi fólki með svona yfirlýsingum verður ekki til að leysa deiluna, nei,” segir forseti ASÍ. Farið sé að gæta óþreyju meðal sumra forystumanna verkalýðsfélaganna sem vilji flýta samningaferlinu en málin séu alltaf í höndum samninganefnda félaganna.