Loka Tekjur.is og eyða öllum upplýsingum

Persónuvernd hefur tilkynnt stjórnendum hinnar umdeildu upplýsingasíðu Tekjur.is að birting þeirra á tekjum Íslendinga upp úr skattskrám sé óheimil. Er gerð sú krafa að síðunni verði lokað og öllum gögnum verði eytt. Forsvarsmenn segjast munu tafarlaust fara að ákvörðun Persóunuverndar og því hefur síðunni verið lokað.

Vefnum var hleypt af stokkunum þann 12. október en á vefnum voru birtar upplýsingar um launa- og fjármagnstekjur allra Íslendinga átján ára og eldri. Gátu landsmenn sótt upplýsingarnar gegn gjaldi. Hægt var að nálgast upplýsingar með greiðslu áskriftargjalds sem nemur 2.790 kr. fyrir fyrsta mánuðinn og svo 790 kr. á mánuði eftir það.

Sitt sýndist hverjum um tilurð vefsins en forsvarsmenn vísuðu í lög um tekjuskatt. Þar segir í 2. mgr. 98. greinar laganna: 

„Skattskrá skal liggja frammi til sýnis í tvær vikur á hentugum stað. (...) Heimil er opinber birting á þeim upplýsingum um álagða skatta, sem fram koma í skattskrá, svo og útgáfa þeirra upplýsinga í heild eða að hluta.“

„Varhugavert fyrir tjáningarfrelsið“

Forsvarsmenn Tekjur.is segja að ákvörðun stjórnar Persónuverndar komi verulega á óvart. Hver sem er geti nálgast upplýsingarnar hjá ríkisskattstjóra.

„Í ákvörðuninni er algjörlega skautað framhjá þeirri staðreynd, sem og þeim lagaákvæðum sem tilgreina að útgáfa upplýsinga úr skattskrá sé heimil, í heild eða að hluta til. Stjórn Persónuverndar túlkar skattalög þannig, að eingöngu sé heimilt að gefa skattskrána út á pappír en ekki rafrænt. Þess má geta, að skattskráin telur um 6.700 síður og því er prentuð útgáfa tæpast raunhæf,“ segir í tilkynningu til viðskiptavina.

Vilhjálmur H. Vilhjálmsson, lögmaður segir niðurstöðuna áhyggjuefni.

„Sú túlkun stjórnar Persónuverndar að gagnagrunnar falli ekki undir fjölmiðlun er áhyggjuefni og er varhugaverð fyrir stöðu tjáningarfrelsisins og frjálsrar fjölmiðlunar í landinu. Í því sambandi er rétt að minna á að framkvæmdavaldið skipar meirihluta stjórnar Persónuverndar án tilnefningar.“

Huldukona varð stjórnarformaður

Félagið Viskubrunnur ehf. rekur vefinn Tekjur.is. Voru Jón Ragnar Arnarson og Víðir Pétursson upphaflega skráðir fyrir félaginu. Jón sem stjórnarformaður og Víðir Pétursson sem varamaður.

Viku eftir að vefnum var hleypt af stokkunum urðu breytingar á stjórn. Jón Ragnar hætti í stjórninni og huldukona, Elisabeth Penelope Westhead, sem skráð er til heimilis í Blackpool á Englandi var skráður stjórnarformaður. Jón Ragnar sagðist engin deili þekkja á Elisabeth sem virðist skráð fyrir ýmsum félögum.

Í framhaldinu kom í ljós að Hrannar Pétursson, forsetaframbjóðandinn fyrrverandi og bróðir Víðis, hefði að öllum líkindum haft milligöngu um að nálgast skattskrárnar hjá ríkisskattstjóra.

Að neðan má sjá tilkynningu sem vefurinn sendi viðskiptavinum sínum í morgun

Síðdegis í gær barst lögmanni upplýsingasíðunnar Tekjur.is tilkynning frá stjórn Persónuverndar sem hefur haft starfsemi síðunnar til skoðunar. Stjórn Persónuverndar hefur nú tekið þá ákvörðun að birting opinberra upplýsinga úr skattskrá á vefsíðunni sé óheimil og gert þá kröfu að síðunni verði lokað. Þá er gerð sú krafa að rekstraraðili síðunnar eyði öllum tengdum gögnum. Tekjur.is mun tafarlaust fara að ákvörðun Persónuverndar og því hefur síðunni verið lokað.



Ákvörðun stjórnar Persónuverndar kom verulega á óvart, enda eru á upplýsingasíðunni eingöngu birtar upplýsingar sem þegar eru opinberar samkvæmt lögum og hver sem er getur nálgast hjá ríkisskattstjóra. Í ákvörðuninni er algjörlega skautað framhjá þeirri staðreynd, sem og þeim lagaákvæðum sem tilgreina að útgáfa upplýsinga úr skattskrá sé heimil, í heild eða að hluta til. Stjórn Persónuverndar túlkar skattalög þannig, að eingöngu sé heimilt að gefa skattskrána út á pappír en ekki rafrænt. Þess má geta, að skattskráin telur um 6.700 síður og því er prentuð útgáfa tæpast raunhæf.

Tekjur.is þakkar almenningi fyrir góðar viðtökur og gagnlega umræðu um tekjuskiptingu og skattlagningu í samfélaginu. Tekjur.is telur ákvörðun stjórnar Persónuverndar í andstöðu við lög og mun skoða réttarstöðu sína, enda er ljóst að ákvörðunin veldur umtalsverðu fjártjóni.

Virðingarfyllst,

Tekjur.is