Annar leikur Þórs/KA í Meistaradeildinni │Sjáðu mörkin úr fyrsta leiknum

Íslandsmeistarar Þórs/KA leika annan leik sinn af þremur í forkeppni Meistaradeildar Evrópu í kvöld þegar liðið mætir Írlandsmeisturum Wexford Youths.

Þór/KA vann öruggan 2-0 sigur á Norður-Írlandsmeisturum Linfield í fyrstu umferðinni á meðan Wexford beið lægri hlut fyrir Ajax, 4-1, eftir að staðan í leikhléi var markalaus. Þær írsku komust svo yfir í upphafi síðari hálfleiks en hollenska stórveldið tók leikinn algjörlega yfir í kjölfarið og skoraði fjögur mörk.

Wexford Youths stefnir hraðbyri á að verja titil sinn heimafyrir þar sem liðið er taplaust eftir fjórtán umferðir og hefur níu stiga forskot á toppi írsku úrvalsdeildarinnar.

Leikurinn hefst klukkan 18:30 og verður fylgst með honum á heimasíðu Þórs og öðrum samfélagsmiðlum félagsins.

Heimasíðan fylgir liðinu hvert fótspor og hefur sett saman myndband með helstu tilþrifum fyrsta leiksins. Það má sjá hér fyrir neðan.