Magni með mikilvægan sigur en vandræði Selfyssinga halda áfram

Magni frá Grenivík vann afar mikilvægan 3-1 sigur á Selfyssingum í botnbaráttunni í Inkasso-deild karla í kvöld.

Gunnar Örvar Stefánsson kom Magna yfir á 44. mínútu og á 70. mínútu tvöfaldaði Kristinn Þór Rósbergsson forystuna.

Selfyssingar klóruðu í bakkann. Aron Ýmir Pétursson minnkaði muninn á 72. mínútu en þremur mínútum fyrir leikslok skoraði Gunnar Örvar annað mark sitt og þriðja mark Magna.

Magni er því komið af botninum. Liðið er nú í ellefta sæti með 12 stig, stigi frá ÍR sem er sæti ofar, en Selfyssingar eru á botninum með ellefu stig.

Úrslit og markaskorarar eru fengnir frá úrslit.net.